Gobierno del Principado de Asturias

Asturias, mucho más cerca

Estás en

Aniciu Temes Ganadería Sanida Animal La tuberculosis bovina mengua un 28 % n’Asturies y ponse per ...
 

Sanida Animal

La tuberculosis bovina mengua un 28 % n’Asturies y ponse per debaxo del 0,1 % el segundu añu siguíu

L’índiz de prevalencia baxó hasta’l 0,058 % nel 2018, frente al 0,081 del exerciciu anterior. La conseyera de Desenvolvimientu Rural señala que la Unión Europea va declarar el Principáu llibre de la enfermedá nel 2022 si se caltién esta tendencia

El director xeneral de Ganadería, Ibo Álvarez, y la conseyera de Desenvolvimientu Rural y Recursos Naturales, María Jesús Álvarez

04/03/2019

La conseyera de Desenvolvimientu Rural y Recursos Naturales, María Jesús Álvarez, anunció güei que l’índiz de prevalencia de la tuberculosis bovina asítiase nel Principáu nel 2018, la segunda vez na historia de les campañes de saniamientu ganaderu, per debaxo del 1 %. En concreto, baxó un 28 %, del 0,081 % del 2017 al 0,058 % del añu pasáu. Según Álvarez, si se caltién esta tendencia nos cuatro años vinientes, Asturies diba declarase rexón llibre de la enfermedá pola Unión Europea (UE).

Pa considerar desaniciada la enfermedá, la UE esixe caltener un índiz de prevalencia inferior al 0,1 % seis años siguíos. “El primeru de los requisitos ye que’l porcentaxe de rebaños bovinos, cola infección confirmada, nun supere’l 0,1 % anual de tolos rebaños nesi periodu y, polo menos, un 99,9 % de los mesmos consiguieren l’estatutu d’oficialmente indemnes de la enfermedá”, esplicó la conseyera.

Amás, añedió, Asturies yá cumple los demás requisitos, porque dispón d’un sistema d’identificación y rexistru d’animales de la especie bovina, d’alcuerdu col reglamentu de la Comisión Europea de 1997, y los reses sacrificaos son sometíos a un exame oficial posterior. Amás, cumple tamién los procedimientos de suspensión y retirada del estatutu de rebañu oficialmente indemne de tuberculosis.

La conseyera avisó de que, a pesar de los bonos resultaos, ye imprescindible nun baxar la guardia y incidir nos puntos de más riesgu; ente otros, un mayor control de la tuberculosis na fauna montés y n’otros animales domésticos, l’alzada, el pastu comunal y los movimientos d’animales.



Modelu a nivel nacional

Álvarez aseguró qu’Asturies ye un modelu a nivel nacional “en xestión de les campañes ganaderes”. Nesti sentíu, recordó que yá nel 2017 la prevalencia de l’afección baxó hasta’l 0,08 %, mentes que la media nacional foi del 2,32 %; polo que’l Principáu asitiábase 29 veces per debaxo.

La comunidá ta considerada rexón llibre de brucelosis bovina pola UE dende febreru del 2017 y de brucelosis caprina y ovina, dende’l 2013. “Pue afirmase que’l programa d’erradicación va pel bon camín, gracies al esfuerciu y collaboración de los ganaderos asturianos”, valoró la titular de Desenvolvimientu Rural.

L’orixe de les campañes oficiales contra la tuberculosis bovina n’Asturies remóntase a la década de los años 80 del sieglu pasáu y son obligatories pa toles esplotaciones dende 1986. El programa d’erradicación ye una normativa d’ámbitu nacional, ellaborada pol Ministeriu d’Agricultura en collaboración con toles comunidaes autónomes, y aprobáu pola UE.

La tuberculosis ye una enfermedá crónica, qu’afecta a distintes especies d’animales, incluyida la humana. La prueba oficial de diagnósticu in vivo ye la intradermotuberculinización (tuberculina), que diagnostica animales infectaos, amás d’enfermos. Nun existen pruebes contradictories nin contraanálisis pa esta prueba. L’ausencia de lesiones visibles en mataderu o cultivu positivu nos animales sacrificaos en nengún casu pue llevar a la conclusión de que l’animal nun taba infectáu.

La execución del programa ye requisitu indispensable p’ameyorar les condiciones sanitaries de les esplotaciones y favorecer los intercambeos comerciales d’animales y los sos productos. Polo tanto, ye una garantía y un aval pa los ganaderos asturianos, tanto a nivel européu como estracomunitariu, amás de pa los consumidores de carne y lleche de la ganadería del Principáu.

 

Información sobre el documento

© Copyright 2006. Gobierno del Principado de Asturias