Gobiernu del Principau d'Asturies

Asturies, muncho más cerca

Tas en

Asturias.es Temes Infraestructures y territoriu La Conseyería de Sanidá axudica’l proyectu del centru nuevu de ...
 

Infraestructures y territoriu

La Conseyería de Sanidá axudica’l proyectu del centru nuevu de salú de Sotrondio en 147.620 euros y un plazu de cuatro meses

El Principáu cunta llicitar les obres na seronda con cargu a los 260. 000 euros incluyíos nel programa d’inversiones. L’equipamientu, que se va asitiar na parcela del teatru Virginia, va incorporar servicios de fisioterapia, salú bucodental y atención a la muyer

D'esquierda a derecha: L'alcalde de Samartín del Rei Aurelio, Enrique Fernández; el conseyeru de Sanidá, Francisco del Busto; la directora xeneral de Planificación Sanitaria, Concepción Saavedra, y el xefe de la Unidá d'Obres de la Conseyería de Sanidá, Jesús Menéndez

16/04/2019

La Conseyería de Sanidá axudicó’l proyectu pa la construcción del centru de salú nuevu de Sotrondio (Samartín del Rei Aurelio) al estudiu d’arquitectura de Miguel Ángel García-Pola en 147.620,24 euros. Esti presupuestu incluye’l proyectu básicu, el d’execución, la dirección d’obra y l’estudiu de seguranza. Les obres van ser cofinanciaes pola Unión Europea al traviés del Fondu Européu de Desenvolvimientu Rexonal (Feder).

El conseyeru Francisco del Busto comunicó güei l’axudicación al alcalde de Samartín del Rei Aurelio, Enrique Fernández, nuna entrevista que dambos tuvieron esta mañana. El proyectu básicu ha tar presentáu nun máximu de cuatro meses cola mira de llicitar les obres na seronda.

Esta axudicación forma parte del plan d’inversiones de Sanidá p’anguaño, que cunta con 260.000 euros pal equipamientu. El centru, que se va construyir na parcela del antiguu teatru Virginia, va sustituyir al actual, allugáu nos baxos d’un inmueble averáu y que les sos instalaciones quedaron pequeñes y obsoletes.

Del Busto recordó qu’esti proyectu “atiende una demanda ciudadana vieya pa dotar a estos pacientes y a los profesionales del área d’un edificiu más accesible y alcontradizu onde vamos poder dar una atención sanitaria de más calidá y más cercana a la comunidá”.

El conseyeru sorrayó qu’esti tipu d’equipamientos son “una bona muestra del compromisu del Gobiernu del Principáu”. “Al empar que nun perdemos de vista la necesidá d’anovar grandes hospitales como Cabueñes, tamién creyemos que ye esencial caltener una bona rede d’atención primaria que ye onde se resuelven la inmensa mayoría de les demandes d’atención y onde se fai un esfuerciu bien importante na promoción de la salú”, añedió.

La propuesta inicial del arquiteutu supón recuperar la portada del Teatru Virginia y utilizar el color de los relieves pa treslladalo al restu del edificiu creando un dameru irregular de formes cuadrangulares nes parés esteriores.

Como novedaes principales, la superficie del centru va superar en cuasi mil metros cuadraos la del actual, va incorporar dos unidaes de salú bucodental y fisioterapia, urxencies y un área completa d’atención a la muyer con dos consultes, una sala de preparación al partu de 40 metros cuadraos y una zona d’espera independiente.

La unidá de salú bucodental va disponer de consultes d’odontólogu y hixenista dental, mentes que la de fisioterapia va incluyir una consulta y un ximnasiu de 70 metros cuadraos.

Nel espaciu independiente que s’acuta pa les urxencies va haber consultes pa medicina y enfermería, una sala d’observación, sala de tar de personal y cuatro cuartos con bañu pa los profesionales de guardia.

El centru complétase con cuatro consultes de medicina xeneral, una de pediatría, trés d’enfermería y otros trés polivalentes, diez sales d’espera, una unidá de sofitu asistencial con zones d’estracción, d’espera, de tecnoloxíes nueves y de tratamientos, y un área d’alministración muncho más accesible.

 

   Icono gráfico alusivo al tipo de archivo Audiu (Audiu: 374 Kb) (n'español)

Información sobre el documento

© Copyright 2006. Gobiernu del Principau d'Asturies