Gobierno del Principado de Asturias

Asturias, mucho más cerca

Estás en

Aniciu La Conseyería d’Infraestructures pon en serviciu los accesos al ...
 

Aniciu

La Conseyería d’Infraestructures pon en serviciu los accesos al Parque Empresarial del Principáu d’Asturies n’Avilés

L’actuación, mui complexa, riquió un presupuestu de 26,5 millones y una década de trabayu. Ún de los viales va llevar el nome del empresariu Daniel Alonso, en reconocencia a la so trayectoria empresarial, caracterizada pol llabor d’impulsu y modernización de la industria asturiana

d'esquierda a derecha, el conseyeru d'Infraestructures, Ordenación del Territoriu y Mediu Ambiente, Benigno Fernández Fano; l'alcaldesa d'Avilés, Mariví Monteserín; l'empresariu Daniel Alonso y ún de los sos fíos, del mesmu nome

10/06/2019

La Conseyería d’Infraestructures, Ordenación del Territoriu y Mediu Ambiente abrió esti llunes al tráficu los accesos al Parque Empresarial del Principáu d’Asturies (PEPA), n’Avilés, depués d’una inversión de más de 26,5 millones y más d’una década de trabayos.

Los conseyeros d’Infraestructures, Benigno Fernández Fano, y Industria, Isaac Pola, visitaron güei Avilés, en compañía de l’alcaldesa, Mariví Monteserín, y otres autoridaes. Nel actu, reivindicaron la importancia d’una actuación de gran complexidá que resuelve tolos movimientos posibles ente’l PEPA, la N-632 y lo que yera l’autovía AI-81, güei llamada AS-392, en tolos sentíos de circulación.

La pasarela d’accesu al PEPA va llevar el nome de Daniel Alonso en reconocencia a una trayectoria empresarial caracterizada pol so llabor d’impulsu y modernización de la industria asturiana y el so apueste pola investigación, la innovación, la cualificación del trabayu, la internacionalización comercial y la protección medioambiental.

Con seis décades de vida empresarial, el Grupu Daniel Alonso algamó una espansión significativa per Europa, Asia y América. Con sede n’Avilés, participa en proyectos líderes a nivel mundial y fabrica estructures d’aceru pa la producción d’enerxía anovable, el diseñu y fabricación d’equipos y grandes estructures pal sector petroquímicu, enerxéticu, naval, de grandes bienes d’equipu, y el tratamientu integral del aceru. Esta trayectoria yá lu fixo merecedor de la Medaya d’Asturies, nel 2007, y de la del Méritu nel trabayu, nel 2011.

Tocante a les característiques técniques, tal como esplicó’l director xeneral d’Infraestructures José María Pertierra, l’enllaz del PEPA tien forma de trompeta, con un vial perimetral de doble calzada na vera sureste del Parque Empresarial, que conecta cola autovía, la variante d’Avilés y la marxe derecha del puertu. La plataforma de los viales resolvióse con siete grandes estructures de tableros mistos con caxón metálicu y llábana cimera de formigón. Amás, en dos d’elles, una sobrevolando l’AS-392 y otra de desembarcu nel polígonu, proyectóse tableru doble porque s’asitien nel ramal principal d’accesu al PEPA, de sentíu doble. Estos elementos sumen un costu de 17 millones, aproximao un 64 % del presupuestu total de les obres.

La integración correcta de les obres nel mediu ambiente llogróse coles midíes correctores d’impactu ambiental oportunes, como la hidrosema de turries de desmonte y terremplén, cubriendo una superficie de más de 25.000 metros cuadraos y el plantíu d’arbustos. Tamién s’instalaron 2.000 metros de pantalles anti-ruíu.

 

Información sobre el documento

© Copyright 2006. Gobierno del Principado de Asturias