Gobiernu del Principau d'Asturies

Asturies, muncho más cerca

Tas en

Asturias.es Temes Artesanía y comerciu Comerciu El Gobiernu d’Asturies prorroga la suspensión d’autorizaciones ...
 

Comerciu

El Gobiernu d’Asturies prorroga la suspensión d’autorizaciones pa l’apertura d’establecimientos de xuegu

La Conseyería de Facienda prepara’l decretu que va establecer el númberu máximu de locales d’apuestes nel Principáu. L’Executivu dedica más de diez millones a obres en seis carreteres, incluyíos 7 p’ameyorar la que xunta Pravia y Salas. El Principáu destina 3,9 millones pa la convocatoria del programa Mozu Ocúpate, qu’ameyora l’inxerimientu llaboral depués de dexar ceo los estudios

02/07/2020

El Conseyu de Gobiernu aprobó una prórroga nueva de la moratoria que caltién la suspensión de les autorizaciones pa l’apertura d’establecimientos de xuegu nel Principáu d’Asturies.

L’Executivu yá alcordare dos prórrogues nos pasaos 26 de marzu y 14 de payares del 2019. La decidida güei, otra vez pa un máximu d’ocho meses, respuende principalmente a la dificultá pa predicir les consecuencies del estáu d’alarma, qu’obligó al zarru temporal de los establecimientos de xuegu. Quieren evaluase cuestiones como la repercusión d’esti parón sobre la viabilidá de dalgunos locales o los efectos de midíes sanitaries como la llimitación d’aforos o l’establecimientu de distancies mínimes de seguranza.

La Conseyería de Facienda trabaya nel decretu que va regular l’actividá de xuegu y apuestes n’Asturies. Ello ye que la propuesta inicial atópase en fase d’información pública dende’l 25 de xunu. Desque se remate esti procesu, el testu va sometese al Conseyu del Xuegu, del que formen parte les alministraciones locales, el colectivu de ludópates, el sector empresarial, sindicatos, el Conseyu de la Mocedá, asociaciones de consumidores y usuarios y la mesma Alministración autonómica. Depués, va ser la vez pal Conseyu Consultivu, como pasu previu a l’aprobación final pol Gobiernu.

El Principáu ye una de les comunidaes autónomes con menos ufierta de xuegu (1 casinu, 6 bingos, 28 salones de xuegu y 9 locales d’apuestes) y de les poques que tien una política de publicidá restrictiva nesta materia, amás d’un programa de prevención de ludopatía. Amás, tien control d’accesu en tolos establecimientos y torga la entrada a menores y persones inscrites nel rexistru de prohibíos, cuestión na qu’Asturies foi pionera.

Xustamente, na propuesta de decretu sometida a información pública establezse que’l númberu d’establecimientos anguaño autorizaos seya’l máximu. Namás podría aumentar poles llicencies pendientes de resolver n’ámbitu municipal y que se solicitaren primero del 26 de marzu del 2019.

Desque resueltes estes solicitúes pendientes, quedaría afitada la cantidá final d’establecimientos. Igualmente, propónse que si zarrare dalgún d’estos locales, el máximu autorizáu tamién menguare nel mesmu númberu.



Meyora de la rede viaria rexonal

L’Executivu dio lluz verde a una inversión global de 10.200.608 euros pa la contratación d’obres d’arreglu y meyora en seis carreteres del Principáu, que van salir a llicitación nos díes vinientes. Estes actuaciones, previstes nos presupuestos xenerales del 2020, van ayudar a aumentar la seguranza y la comodidá de los usuarios.

Les actuaciones autorizaes son estes:

  • Carretera Pravia-Salas
  • L’Executivu autorizó un gastu plurianual de 6.664.141 millones pa les obres d’enanche y meyora del tramu de carretera que xunta Pravia y Veigafriosa, perteneciente a l’AS-369 (Pravia-Salas), con un plazu d’execución de 24 meses. D’esta partida, que se parte en trés anualidaes, van invertise 200.000 euros nel 2020, 3.050.000 nel 2021 y 3.414.141 nel 2022. Amás, l’Executivu autorizó un gastu plurianual de 413.107 euros pa la contratación del serviciu d’asistencia técnica a la dirección d’obres.
  • El proyectu que va executar la Conseyería de Mediu Rural y Cohesión Territorial va consistir, ente otres actuaciones, na meyora del trazáu, amás del enanche de la plataforma pa construyir una calzada de 7 metros d’anchor, con dos carriles de trés metros. El trazáu va aprovechar la plataforma de la carretera actual y va ameyorar sustancialmente la xeometría, cola mira d’ameyorar los radios de delles curves y dotales de sobreanchos y peraltes afayadizos.
  • Les obres suponen una meyora curiosa de les característiques de la carretera actual, tanto nel trazáu como en seguranza vial, yá que se van evitar les dificultaes actuales pal encruz de camiones en delles curves.
  • Carretera Candás–San Zabornín
  • Tamién s’autorizaron 1.667.158 millones n’obres d’arreglu de la carretera CE-1, que xunta Candás y San Zabornín, nel conceyu de Carreño, con un plazu d’execución de siete meses. D’esta cantidá, 300.000 euros van invertise anguaño y 1.367.158 nel 2021.
  • El vial, con un llargor de 7,1 quilómetros, xébrase en trés tramos estremaos según les actuaciones a realizar: el centru urbanu de Candás, dende la salida de Candás hasta l’accesu a El Pieloro y, p’acabar, ente San Zabornín y Posadorio.
  • Carretera de Quintueles (Villaviciosa)
  • Na renovación de pavimentu de la carretera de Quintueles (VV-I), en Villaviciosa, van invertise 394.775 euros, de los que 100.000 consígnense anguaño y 294.775 l’exerciciu viniente, con un plazu d’execución de siete meses.
  • Carretera Xixón-La Pola Siero
  • Amás, 346.290 euros van destinase a les obres d’arreglu de fundimientos na carretera AS-377, que xunta La Pola Siero y Xixón, nel conceyu de Siero. El plazu d’execución va ser de cuatro meses.
  • Carretera de Caldevilla (Piloña)
  • Otros 301.340 euros van dirixíos al arreglu de la carretera de Caldevilla (PI- 13), nel conceyu de Piloña. D’esti montante, 100.000 euros consígnense nel 2020 y 201.340 nel 2021. El plazu d’execución va ser de cuatro meses.
  • La execución d’estes obres va iguar los defectos actuales nel pavimentu. Amás, va ameyorar el drenaxe, va instalase una barrera de seguranza, a asitiar señalización vertical y pintar marques viales.
  • Carretera Grau-Tameza

Igualmente, van dedicase 413.797 euros a reparar el tramu ente Grau y San Pedru, perteneciente a la carretera AS-311 (Grau-Tameza), con un plazu d’execución de siete meses. Esti montante económicu pártese en dos anualidades: 100.000 euros nel 2020 y 313.797 nel 2021. En total, la conseyería va actuar a lo llargo de 8,2 quilómetros, en dos tramos estremaos. Nún van realizase llabores de llimpieza y va reponese la señalización horizontal, y nel otru va anovase, amás, el pavimentu.



Fomentu del inxertamientu llaboral de mocedá

El Principáu autorizó un gastu de 3,9 millones pa la puesta en marcha d’una convocatoria nueva del programa Mozu Ocúpate, destináu a ameyorar l’inxertamientu llaboral de mocedá desempleao pente medies d’un modelu mistu que combina formación teórica con periodos de práctiques profesionales.

Esti proyectu, impulsáu pol Serviciu Públicu d’Empléu del Principáu d’Asturies (Sepepa), va facer posible tener una formación profesional en competencies clave, amás d’adquirir otres habilidaes pal inxertamientu n’ámbitu llaboral. El programa ta dirixíu a mozos qu’abandonaron el sistema educativu a edaes tempranes y permanecen fuera del mercáu llaboral. Enmárcase nes directrices de la Estratexa Europea 2020, el Plan Nacional de Garantía Xuvenil y el Plan de choque pol empléu mozu aprobáu pol Gobiernu d’España pal periodu 2019-2021.

La convocatoria pal periodu 2020-2021 va dexar financiar la formación d’un máximu de 300 persones. Un 67 % del presupuestu, que va beneficiar a 201 mozos, va destinase a entidaes públiques y el 33 % restante, correspondiente a la capacitación de 99 persones, pa entidaes ensin ánimu d’arriquecimientu. Van poder participar:

  • Entidaes locales, los sos organismos autónomos y entidaes con competencies en materia de promoción del empléu, bien dependientes, o vinculaes a les mesmes, que la so titularidá correspuenda dafechu a eses entidaes locales.
  • Asociaciones, fundaciones y otres entidaes ensin ánimu d’arriquecimientu.
  • Otres asociaciones de conceyos dotaes de personalidá xurídica propia.

Les árees de formación incluyen el cuidáu del patrimoniu natural (montes, veres de ríos, sitios degradaos...), actividaes deportives y d’ociu o cuidaos a persones, ente otres. L’estímulu económicu pa la participación distribúyese progresivamente a lo llargo de los 9 meses de duración, dende un 25 % del Salariu Mínimu Interprofesional al empiezu del programa hasta al 100 % nel últimu mes de formación. Mozu Ocúpate va entamase coincidiendo col cursu escolar pa favorecer la futura incorporación de la mocedá a la formación reglada como alternativa al inxertamientu profesional.

Na edición pasada del programa Mozu Ocúpate participaron 291 persones.



Financiamientu de proyectos d’I+D+i

L’Executivu autorizó un gastu de 400.000 euros pa financiar la convocatoria pública de subvenciones del Institutu de Desenvolvimientu Económicu del Principáu (Idepa) pal financiamientu de proyectos d’I+D+i en cooperación internacional de les empreses asturianes, nel marcu de la convocatoria de la Era-Net Manunet del 2020

L’esquema Era-Net Manunet ye una iniciativa promovida pola Comisión Europea pa fomentar la coordinación de los programes d’ayudes rexonales y nacionales dirixíos a proyectos d’I+D tresnacionales nel campu de la fabricación con un nivel de riesgu científicu y técnicu significativu y una clara orientación al mercáu.

Estes ayudes diríxense a tolos campos de la fabricación, anque na actualidá concéntrense nestos ámbitos:

  • Inxeniería y tecnoloxíes de la información y les comunicaciones pa la fabricación, incluyendo Industria 4.0.
  • Tecnoloxíes de fabricación p’aplicaciones ambientales y enerxétiques, incluyendo eficiencia nos recursos, recicláu y economía circular en procesos de fabricación.
  • Tecnoloxíes de fabricación adaptativa.
  • Fabricación aditiva.
  • Materiales nuevos pa fabricación.
  • Métodos nuevos de fabricación, componentes y sistemes.
  • Otres tecnoloxíes, productos y servicios rellacionaos col campu de la fabricación (loxística, cadena de suministru…).

Manunet allíniase temáticamente cola estratexa rexonal Asturies RIS3, prioritariamente col campu d’especialización Modelos Nuevos de Producción. Dende’l 2013 y al traviés d’esti programa, empreses asturianes participaron nuna ventena de proyectos collaborativos.

Información sobre el documento

© Copyright 2006. Gobiernu del Principau d'Asturies