Gobiernu del Principau d'Asturies

Asturies, muncho más cerca

Tas en

Asturias.es Temes Emplegu Desconvocada la fuelga de supermercaos depués d’asumir les ...
 

Emplegu

Desconvocada la fuelga de supermercaos depués d’asumir les partes el llamamientu al diálogu suxeríu pol Gobiernu d’Asturies

La representación empresarial y los sindicatos acepten reunise’l 13 de xineru y volver a les negociaciones del conveniu colectivu. El conseyeru d’Industria y el director xeneral d’Empléu y Formación unviaron esta tarde una carta instando a buscar una solución pactada

27/12/2019

L’Asociación de Supermercaos d’Asturies (Asupa) y los sindicatos UXT, CC. OO. y USO van volver axuntase pa tratar d’algamar una solución negociada sobre’l conveniu colectivu del sector. Dambes partes dieron una respuesta positiva al pidimientu oficial realizáu esta tarde pola Conseyería d’Industria, Empléu y Promoción Económica instando al diálogu y a una solución negociada del conflictu.

Al traviés d’una carta soscrita pol titular de la conseyería, Enrique Fernández, y pol director xeneral d’Empléu y Formación, Pedro Fernández-Raigoso, los sindicatos con representación nel sector y la parte empresarial aceptaron caltener un alcuentru’l 13 de xineru pa volver a les negociaciones del conveniu sectorial.

La respuesta satisfactoria a la solicitú d’entendimientu treslladada dende’l Gobiernu d’Asturies ayuda a desactivar la fuelga nos supermercaos asturianos, que la so segunda fase diba empezar a les 22:00 hores de güei.

El Gobiernu d’Asturies agradez l’esfuerciu de dambes partes tanto pola desconvocatoria de la fuelga como pol compromisu de tener l’alcuentru mentáu y enfótase en que s’avance na consecución d’un alcuerdu satisfactoriu.

Información sobre el documento

© Copyright 2006. Gobiernu del Principau d'Asturies