Gobierno del Principado de Asturias

Asturias, mucho más cerca

Estás en

Aniciu El programa Paideia algama’l récord na so tercera edición con ...
 

Aniciu

El programa Paideia algama’l récord na so tercera edición con 300 participaciones de deportistes d’altu rendimientu

La iniciativa, qu'estiende la formación al ámbitu cultural, propunxo 18 convocatories nesti cursu. La presidenta del Conseyu Superior de Deportes empondera'l proyectu promovíu pol Gobiernu d'Asturies

De izquierda a derecha, Francisco Rionda, tutor de los alumnos que entrenan en los centros de tecnificación deportiva asturianos, el viceconsejero de Cultura y Deporte, Vicente Domínguez, y Roberto Díaz, técnico del CTD de béisbol

26/06/2019

La tercera edición del programa Paideia d'estensión cultural, dirixíu a deportistes d'altu rendimientu que cursen estudios y entrenen n'Asturies, cerróse coles meyores cifres desque'l Gobiernu asturianu se punxo en marcha, nel cursu 2016-2017. Les 18 convocatories promovíes rexistraron 299 participaciones de los 43 alumnos que tuvieron accesu al programa.

El viceconseyeru de Cultura y Deporte, Vicente Domínguez, realizó güei el balance del programa nun actu celebráu nel Parque de la Prehistoria, en Teberga, nel que tuvo acompañáu pol tutor de los deportistes, Francisco Rionda, y polos técnicos de les disciplines impartíes nos centros d'altu rendimientu del Principáu.

Precisamente'l Parque de la Prehistoria foi una de les visites con mayor participación del alumnáu deportista, namás superada poles realizaes al Muséu Fernando Alonso y a la esposición Pedro Masaveu: Pasión por Sorolla, la de mayor ésitu de Paideia d'esti cursu.

El programa permitió a los alumnos deportistes visitar tamién el Pozu Sotón, en Samartín de Rei Aurelio, y la central hidroeléctrica de Proaza, obra del arquiteutu Joaquín Vaquero Palacios que'l pasáu añu cumplió 50 años. Los participantes nel Paideia pudieron asistir, coles mesmes, a delles funciones d'ópera nel Teatru Campoamor d'Uviéu (Fuenteovejuna, Un turco en Italia, Tosca o La clemenza di Tito), y del Ballet Nacional (Electra), el d’Hervé Koubi o'l de María Pagés.

El programa incluyó tamién cine, conciertos y funciones de teatru nel Centru Niemeyer y en Llaboral Ciudá de la Cultura, ente los que destaquen la Carmina Burana de la Fura dels Baus, y l'actuación del cantante estadounidense Mike Farris o la de la banda española Patax.

El programa Paideia foi siguíu esti cursu por 43 estudiantes de siete comunidaes autónomes: Asturies, Cantabria, Madrid, Navarra, la Rioja, Canaries y Galicia.



Reconocencia del CSD

El proyectu impulsáu pol Gobiernu asturianu foi valoráu y emponderáu pol Conseyu Superior de Deportes (CSD). La so presidenta, María José Rienda, sorraya nuna carta unviada apocayá al viceconseyeru de Cultura y Deporte que'l programa Paideia “merez una reconocencia más allá de los escelentes resultaos académicos y deportivos” collechaos polos estudiantes que s'entrenen nos Centros de Tecnificación Deportiva asturianos.

Rienda considera que “a la hora de consiguir una formación integral, nel currículu d'un deportista ye de vital importancia un proyectu d'estensión cultural qu'incorpore actividaes tan variaes como la música o les diverses visites a museos, escursiones arqueolóxiques o la conocencia del mediu natural”.

La presidenta del CSD destaca tamién la idoneidá de que “puedan esfrutar d'esta oportunidá deportistes d'otres comunidaes, amás de los asturianos, al tar incluyíos nos planes de tecnificación de les sos respectives federaciones”.

El programa Paideia foi promovíu pola Viceconsejería de Cultura y Deporte en payares de 2016 coles mires de que los deportistes d'altu rendimientu qu'estudien n'Asturies tengan una formación más allá del ámbitu académicu y deportivu, y col enfotu de fomentar la conocencia del patrimoniu históricu y artísticu asturianu, especialmente ente los estudiantes procedentes d'otres comunidaes.

Dende la so puesta en marcha, el programa suma 49 convocatories y 726 participaciones.

 

Información sobre el documento

© Copyright 2006. Gobierno del Principado de Asturias