Gobiernu del Principau d'Asturies

Asturies, muncho más cerca

Tas en

Asturias.es Gobiernu Actualidá El Principáu, el Conceyu d’Uviéu y el sector de l’alimentación ...
 

Actualidá

El Principáu, el Conceyu d’Uviéu y el sector de l’alimentación alcuerden zarrar los establecimientos el Vienres Santu na capital

Industria agradez la sensibilidá del comerciu minorista y les asociaciones sectoriales p’aforrar concentraciones y siguir les recomendaciones de les autoridaes sanitaries

06/04/2020

El Gobiernu d’Asturies modificó la declaración de Zona de Gran Arribación Turística depués de llegar a un alcuerdu col Conceyu d’Uviéu y el sector comercial. Esti cambéu supón que’l Vienres Santu tolos establecimientos d’alimentación de la capital asturiana van permanecer zarraos.

D’alcuerdu cola normativa rellacionada coles grandes urbes, el Vienres Santu taría permitío abrir locales comerciales n’Uviéu, al considerase la capital como ciudá d’alta concentración turística. Sicasí, dada la situación d’estáu d’alarma y les midíes adoptaes pa lluchar contra la crisis sanitaria, considérase que desapaeció la xustificación pa l’apertura esti 10 d’abril.

La Conseyería d’Industria, Empléu y Promoción Económica, al traviés de la Dirección Xeneral de Comerciu, Entamadores y Economía Social, yá solicitare al sector de l’alimentación que nun abriere los establecimientos nos díes festivos de Selmana Santa, cola mira de siguir los conseyos de les autoridaes sanitaries y llimitar los desplazamientos como midida preventiva frente al COVID-19.

A la fin, llegóse a un alcuerdu pa zarrar los comercios d’alimentación d’Uviéu’l Vienres Santu, dexando a la decisión de los operadores l’apertura’l xueves, 9 d’abril. Nesti sentíu, toles superficies comerciales medianes comunicaron al Principáu que nun van abrir nes dos xornaes festives.

El director xeneral de Comerciu, Entamadores y Economía Social, Julio González Zapico, agradeció al comerciu minorista y a les asociaciones sectoriales la so sensibilidá énte la situación d’emerxencia, de la que destacó la collaboración ente’l Gobiernu d’Asturies y el Conceyu d’Uviéu pa reducir desplazamientos y aforrar riesgos pa la ciudadanía. Amás, el determín tomáu ente dambes alministraciones va dexar tamién dar descansos a los trabayadores del sector de l’alimentación.


Icono gráfico alusivo al tipo de archivo Audiu (Audiu: 879 Kb) (n'español)

Información sobre el documento

© Copyright 2006. Gobiernu del Principau d'Asturies