Gobierno del Principado de Asturias

Asturias, mucho más cerca

Estás en

Aniciu Temes Ganadería Sanida Animal La tuberculosis bovina baxa del 0,1% n'Asturies per primer vez ...
 

Sanida Animal

La tuberculosis bovina baxa del 0,1% n'Asturies per primer vez na historia de les campañes de saneamientu

La comunidá podría ser declarada rexón llibre de la enfermedá si caltién esti enclín seis años consecutivos. La conseyera de Desarrollu Rural asiste en Cangas a la clausura del 31 Concursu Puya Nacional de la Raza Asturiana de los Valles

29/04/2018

La conseyera de Desarrollu Rural y Recursos Naturales, María Jesús Álvarez, destacó güei en Cangas, onde asistió a la clausura del 31 concursu puya nacional de la raza Asturiana de los Valles, que per primer vegada na historia de les campañes de saneamientu ganaderu nel Principáu, na del 2017 “la tuberculosis bovina baxó del 0,1%”. Si caltién esa enclín nos próximos cinco años, Asturies sería declarada rexón llibre de la enfermedá pola Unión Europea (UE) en 2022, porque pa considerala erradicada esíxese caltener un índiz de prevalencia inferior al 0,1% en seis exercicios siguíos.

Álvarez señaló que la raza Asturiana de los Valles caltuvo una llinia ascendente dende fai más d'una década, hasta llegar a los 196.700 exemplares de l'actualidá y que'l conceyu de Cangas concentra'l mayor númberu d'exemplares d'esta clase de ganáu con 22.663 cabeces, un 95,3% de la so cabaña ganadera, y tamién el mayor númberu d'esplotaciones, un 97,3% de les qu'existen nel conceyu, 845. El númberu d'esplotaciones nel Principáu ye de 11.189, el 71,8% del total nacional.

La conseyera valoró'l trabayu realizáu polos profesionales de la ganadería y pola Asociación Española de Criadores de Ganáu Vacuno Selecto de la Raza Asturiana de los Valles (Aseava), organizadora de la feria, nel fomentu y la meyora de la raza que ye una de los meyores del país. “Consiguieron tener un bon estatus sanitariu de la cabaña ganadera, aumentar la venta de carne so la Indicación Xeográfica Protexía (IGP) y ameyorar añu a añu'l númberu d'exemplares al traviés del centru de testaxe de Llanera”, indicó.

El resultáu al poner nel mercáu una raza ancestral, con una aptitú cárnica escelente y bien valorada gastronómicamente, ye “escelente”, según afirmó la conseyera, que garantizó amás que’l'so departamentu va siguir sofitando a los conseyos reguladores, a los ganaderos y al sector tresformador, comprometíos cola marca IGP Xata Asturiana “que yá ta dafechu consolidada y ye un productu singular que xenera actividá, economía y empléu nel nuestru mediu rural”.

 

Canales certificaes

En 2017 la marca superó los 23.600 canales certificaes. Tamién aumentó la certificación ecolóxica un 8%. La IGP Xata Asturiana alcuéntrase ente los cuatro que más facturen n'España y ye la segunda de vacuno que se comercializa nel país. La titular de Dearrollu Rural consideró bien bonu'l llabor de Aseava, que'l Gobiernu del Principáu sofita esti añu con 489.500 euros pa la execución d'un programa que contribúi a caltener el llibru xenealóxicu, realizar les pruebes destinaes a mesmo que la promoción. L'asociación cunta con 3.589 miembros y 103.020 animales.

Tamién destacó la evolución de la raza, yá que, “podemos dicir con arguyu que, anguaño, los ganaderos d'Asturies decantáronse pola Asturiana de los Valles, que se ta esportando a otres comunidaes autónomes y punxeron frenu a la penetración de races foranes”.

La conseyera repitió que l'índiz de prevalencia de la tuberculosis bovina n'Asturies asitióse l'añu pasáu, per primer vez na historia de les campañes de saneamientu ganaderu, per debaxo del 0,1%. Concretamente, baxó hasta'l 0,08% frente al 0,17% de 2016, lo que supón un 52% menos. La prevalencia de los establos positivos n'España, según los datos de 2016, ye de 2,87%.

A pesar de loss bonos resultaos de la campaña de 2017, alvirtió de que nun se debe baxar la guardia ya insistió en que ye mester incidir nos puntos de mayor riesgu, ente otros, “un mayor control de la tuberculosis na fauna montesa y n'otros animales domésticos, l'alzada, les camperes comunales y los movimientos d'animales”.

Asturies ta considerada rexón llibre de brucelosis bovina pola UE dende febreru de 2017 y de brucelosis caprina y ovina dende 2013. A xuiciu d'Álvarez, nestos momentos “puede afirmase que'l programa de erradicación de la tuberculosis va per bon camín, gracies al esfuerzu y collaboración de los ganaderos asturianos”.

A lo último, la titular de Desarrollu Local recordó que'l plazu pa solicitar ayudes de la Política Agrícola Común pa 2018, per parte de los ganaderos y llabradores asturianos, amplióse hasta'l 15 de mayu.

   Icono gráfico alusivo al tipo de archivo Audiu (Audiu: 2 Mb) (n'español)

Información sobre el documento

© Copyright 2006. Gobierno del Principado de Asturias