Gobiernu del Principau d'Asturies

Asturies, muncho más cerca

Tas en

Asturias.es El Gobiernu d'Asturies presenta un protocolu sociosanitariu pa ...
 

Aniciu

El Gobiernu d'Asturies presenta un protocolu sociosanitariu pa promover el bon tratu a los mayores y avanzar en derechos sociales

La ferramienta nueva va implantase na rede pública d'atención y va divulgase ente los profesionales con un programa de formación. Unos 350 técnicos de salú y servicios sociales participen güei nuna xornada p'afondar nos aspectos éticos de la intervención na etapa del avieyamientu

La directora general de Política Sanitaria, María Jesús Merayo, y la consejera de Servicios y Derechos Sociales, Pilar Varela, durante la inauguración de la jornada

09/10/2018

El Gobiernu d'Asturies presentó güei’l protocolu sociosanitariu pa la promoción del bon tratu y la detección y intervención énte'l maltratu a persones mayores, una ferramienta nueva ellaborada poles conseyeríes de Servicios y Derechos Sociales y Sanidá, xunto colos servicios sociales municipales. L'oxetivu ye avanzar en derechos sociales escontra una sociedá más respetuosa y inclusiva, qu'empreste atención a la diferencia ente les persones y a les situaciones de vulnerabilidá.

El trabayu céntrase nes persones mayores y busca facilitar una intervención coordinada ente les alministraciones y sistemes de protección. Amás, afonda na sensibilización sobre la necesidá del bon tratu a los mayores, lo mesmo que de prevenir y intervenir énte cualquier abusu. Nun escenariu d'avieyamientu creciente de la población, el protocolu busca conocer meyor esti fenómenu. El so desenvolvimientu enmárcase ente les midíes de coordinación sociosanitaria que'l Principáu impulsó esta llexislatura y que tán facilitando que profesionales de dambos sistemes trabayen n'estructures de coordinación permanentes.

El protocolu probóse ente payares del 2017 y el pasáu xunu, cola participación de 138 profesionales de centros sanitarios, residencies de mayores y servicios sociales municipales. D'equí p'alantre, va aplicase en tola rede pública rexonal y el siguimientu va correr al cargu de los órganos de coordinación sociosanitaria. Amás, pa favorecer la so divulgación va desenvolvese un programa de formación a partir de payares.

La ferramienta nueva, que yá ta a disposición pública y editóse tamién en formatu resumíu pa facilitar el so manexu por parte de los técnicos, encara toles tipoloxíes de maltratu (físicu, psicolóxicu, sexual, financieru, neglixencia y abandonu) y estrema l'ámbitu social-comunitariu, el relacional-familiar, y l'institucional pa mayores que viven nun centru residencial. Pa caún d’estos entornos, establez factores de riesgu y de protección y propón ferramientes d'intervención.

Mientres el procesu de pilotaxe encaráronse 34 casos nos que'l perfil de la persona maltratada correspuéndese mayoritariamente con una muyer mayor, vulnerable, d'ente 80 y 90 años, con patoloxíes propies de la so edá, una dependencia pequeña, un deterioru cognitivu leve y que vive con un fíu varón d'ente 45 y 55 años col que les relaciones familiares previes yeren conflictives. El maltratu suel traducise en neglixencia nel cuidáu y abusu económicu.

 

Sensibilización y formación

La conseyera de Servicios y Derechos Sociales, Pilar Varela, celebró la ellaboración de ferramientes como'l protocolu, que contribuyen a una mayor sensibilización y formación de los profesionales, de la que favorecen la coordinación de recursos pa garantizar la calidá de vida de les persones. Asina mesmo, estimó'l trabayu de los técnicos implicaos na ellaboración del documentu, que da rempuesta a la necesidá de cuntar con ferramientes útiles y contrastaes que dexen oxetivar los casos pal so tratamientu o prevención.

“Ye una amuesa d'innovación social, que ye una de les llinies que tamos impulsando dende la conseyería con cuenta de que los procesos d'intervención social tengan una base científica y establézanse a partir d'esperiencies contrastaes”, señaló.

A lo último, animó a la sociedá a favorecer el bon tratu a los mayores y a denunciar cualquier situación de maltratu.

 

Xornada d'ética socio-sanitaria

El protocolu presentóse nuna xornada sobre ética convocada cola mira de reflexonar sobre la intervención nel procesu d'avieyamientu xunto con 344 profesionales de la salú y los servicios sociales. Nes meses redondes participaron los presidentes de los comités d'ética de dambes cañes de l'atención n'Asturies, Beatriz Pérez y Sergio Gallego, xunto con especialistes en xerontoloxía como Marije Goicoetxea, profesora de Bioética, Ética Profesional y Intervenciones en Psicoloxía de la Salú de la Universidá de Deusto; Mayte Sancho, de Matia Institutu Xerontolóxicu, y Pablo Ignacio Fernández Muñiz, miembru del comité nacional de bioética n'España.

   Icono gráfico alusivo al tipo de archivo Audiu (Audiu: 899 Kb) (n'español)

Información sobre el documento

© Copyright 2006. Gobiernu del Principau d'Asturies