Gobiernu del Principau d'Asturies

Asturies, muncho más cerca

Tas en

Asturias.es El protocolu del Principáu pa prevenir y responder énte’l riesgu ...
 

Aniciu

El protocolu del Principáu pa prevenir y responder énte’l riesgu de suicidiu algama yá’l 80 % de la población

El plan ta implantáu nes árees sanitaries d’Uviéu, Xixón, Avilés y Nalón y va llevase a Mieres en payares. El Sespa aumenta a cuatro’l númberu de psicólogos clínicos encargaos de la terapia grupal y d’atender trestornos mentales n’atención primaria. Güei celébrase’l Día Mundial de la Salú Mental, un problema que va afectar a ún de cada cuatro asturianos a lo llargo de la so vida

10/10/2018

El protocolu impulsáu pol Serviciu de Salú del Principáu (Sespa) pa prevenir y actuar énte’l riesgu de suicidiu implantóse yá nes árees sanitaries VIII (Nalón), IV (Uviéu), V (Xixón) y III (Avilés), polo que da cobertura a 800.000 persones, el 80 % de la población asturiano. El mes que vien va ponese en marcha n’área VII (Mieres) y l’oxetivu ye que tea dafechu operativu en tola comunidá en marzu del 2019.

Dende la so aplicación nel valle del Nalón va seis meses, fixo posible activar 40 alertes. Anguaño, los servicios de salú mental caltienen el siguimientu sobre diez persones, mentes que les demás yá se dieron d’alta. Tanto los usuarios como los profesionales y les asociaciones de pacientes amosaron el so contentu pola implantación del protocolu.

Esti plan ayuda a ameyorar la detección, la coordinación y los tiempos d’intervención y quier identificar de forma precoz a los pacientes con ideación, planificación o conducta suicida, lo que se conoz como comportamientu autolíticu. Pa eso, encárase’l problema dende les consultes d’atención primaria, los sos servicios d’urxencies y los hospitalarios, en coordinación con Salú Mental, col fin de dar respuesta a un fenómenu complexu que’l so orixe respuende a munchos factores.

Los centros de salú tienen una función primordial na aplicación d’esta ferramienta, porque ye nellos onde se detecten los pacientes con ideación suicida y la mayor parte de los intentos autolíticos. Cuando esto asocede, proponer al facultativu realizar una evaluación clínica que dexe establecer el riesgu y, naquellos casos en que s’identifica un enclín autolíticu altu, la intervención ye inmediata.

Otra manera, cuando s’identifica una tentativa suicida nes urxencies d’atención primaria y hospitalaria óptase, en función del riesgu, por derivar el paciente al so médicu de familia o a los servicios de Salú Mental.

Los datos amuesen que’l riesgu de repetición d’un intentu de suicidiu, desque atienden la persona nos servicios hospitalarios d’urxencies, ye del 25 %. Pa evitalo, resulta prioritaria la detección nesti ámbitu, col fin de dar una respuesta que dexe caltener un contactu activu y siguíu col paciente.

 

Más psicólogos clínicos n’atención primaria

Per otra parte, el Sespa sigue reforzando la dotación de psicólogos clínicos na rede d’atención primaria. El Serviciu de Salú punxo en marcha nel 2017 un programa pioneru n’España cola contratación de los dos primeros profesionales pa esti nivel asistencial, al qu’anguaño se sumaron otros dos. Amás, ta previsto que s’incorporen dos más nel 2019.

Estos especialistes atienden trestornos mentales prevalentes como l’ansiedá, la depresión o’l duelu, ente otros. Tamién realicen terapies grupales con pacientes como, por exemplu, muyeres embaranzaes que presenten síntomes d’enfermedá mental o persones afectaes por grandes traumatismos.

El refuerzu de los servicios y l’atención en materia de salú mental del Principáu va reflexase tamién na puesta en marcha, primero que remate l’añu, de trés nuevos pisos tutelaos pa persones con trestornos graves. En total, Asturies va cuntar con 23 viviendes nes que se da sofitu a persones con patoloxíes d’esti tipu y realízase un siguimientu pa facilitar el so reinxertamientu na sociedá.

Güei celébrase’l Día Mundial de la Salú Mental, un problema que va afectar a ún de cada cuatro asturianos a lo llargo de la so vida. El Gobiernu d’Asturies ta comprometíu cola atención a les persones afectaes por estos trestornos, pa lo que caltién en marcha midíes qu’ayuden a la so integración dafechu y a la llucha contra l’estigma social.

 

 

Información sobre el documento

© Copyright 2006. Gobiernu del Principau d'Asturies