Gobiernu del Principau d'Asturies

Asturies, muncho más cerca

Tas en

Asturias.es Temes Servicios sociales Portal Socialasturias Los espedientes del salariu social básicu y de les ayudes a la ...
 

Portal Socialasturias

Los espedientes del salariu social básicu y de les ayudes a la dependencia crecen un 6,5% nel estáu d’alarma, hasta los 392 diarios

El 44% de los trámites resueltos esti añu pola Alministración proceden de la Conseyería de Derechos Sociales y Bienestar. La xestión electrónica permite caltener el ritmu de la mayoría de los procedimientos y los oxetivos del plan de choque p’acabar coles llistes d’espera nel ámbitu de la dependencia. Melania Álvarez anuncia un refuerzu de 30 empleaos públicos pa la tramitación y revisión de la renta mínima autonómica con cargu al fondo de la COVID-19, por un importe de 481. 500 euros. “Agora toca empezar a pensar en nun baxar nunca la guardia, en que debemos consolidar lo aprendío”, diz la conseyera respecto a les actuaciones nes residencias de mayores

28/04/2020

La conseyera de Derechos Sociales y Bienestar, Melania Álvarez, señaló güei que los espedientes del salariu social básicu y de les ayudes a la dependencia aumentaron un 6,5% dende la declaración del estáu d'alarma, hasta llegar a los 392 diarios. Nesti sentíu, sorrayó que, pese al aumentu de la demanda y los axustes de la plantiya impuestos pol teletrabayu, la xestión electrónica permitió caltener el ritmu de tramitación de la mayoría de los procedimientos, mesmo que los oxetivos del plan de choque p’acabar cola llista d'espera nel ámbitu de la dependencia.

“Cuando llegamos a esta conseyería asumimos un compromisu cola ciudadanía y, magar esta crisis sobrevenida, caltenémosnos nos plazos previstos. Nun vamos dar nin un pasu atrás nin vamos remacariar esfuerzos nesti ámbitu”, indicó Álvarez na so participación n'una videoconferencia col grupu de trabayu constituyíu na Xunta Xeneral pal siguimientu del coronavirus.

La titular de Derechos Sociales esplicó qu'el 44% de los espedientes resueltos pola Alministración autonómica dende'l 1 de xineru pertenecen al so departamentu. La mayoría tán rellacionaos cola xestión d'ayudes a la dependencia y el salariu social básicu (59%), la valoración de discapacidá (32%) y les ayudes a la vivienda (8%). En concreto, nos primeros 17 díes d'esti mes tramitáronse 5.090 espedientes de dependencia y salariu social básicu. A xuiciu de la conseyera, ye mester siguir impulsando procesos que permitan ganar axilidá na xestión y facilitar la presentación de solicitúes per parte de la ciudadanía.

Álvarez tamién anunció que va reforzar con 30 emplegaos públicos más la plantiya que s'encarga de la xestión y revisión de la renta mínima autonómica, lo que va suponer un gastu de 481.500 euros que se va financiar con cargu al fondu COVID-19. “D'esta miente, anticipámosnos pa asitianos nel peor de los escenarios que podría producise a partir de xunu, con una medra de la solicitúes de salariu social básicu del 100% y una media de 500 pidimientos al mes, tal que asocedió nos momentos más delicaos de la pasada crisis”, señaló.



Analís de residencies

Per otra parte, la conseyera analizó l'impactu de la COVID-19 nes residencies de mayores ya incidió na necesidá de nun baxar la guardia de cara al futuru. “Anque hai unu enclín de meyora, tenemos de consolidar lo aprendío y siguir promocionando'l cuidáu de la salú y la coordinación cola parte sanitaria. Ficímoslo nun tiempu récord vamos siguir faciéndolo”, manifestó.

Na so intervención, informó de qu'esta selmana va entrar a valir un procedimientu que va permitir a les persones que viven n'una residencia pasar esta crisis coles sos families nes sos cases, si asina lo deseyen, siempre que dean negativo en coronavirus na prueba de llaboratoriu PCR y so la firma d'una declaración responsable. “Pretendemos humanizar tolos procesos, pero ufiertando siempre garantíes y col aval de la Conseyería de Salú y del Serviciu d'Epidemioloxía”, añedió.

Icono gráfico alusivo al tipo de archivo Audiu (Audiu: 1 Mb) (n'español)

Información sobre el documento

© Copyright 2006. Gobiernu del Principau d'Asturies