Gobiernu del Principau d'Asturies

Asturies, muncho más cerca

Tas en

Asturias.es Temes Artesanía y comerciu Más de 70 creadores participen dende mañana en Rosaleda ...
 

Artesanía y comerciu

Más de 70 creadores participen dende mañana en Rosaleda d’Artesanos 2019, la feria de referencia del sector nel Principáu

El certame, que celebra la trentésima edición, va tar abiertu hasta’l 5 de xineru n’El Campo San Francisco d’Uviéu. La Conseyería d’Industria tien censaos nel rexistru oficial 224 profesionales en 66 oficios tradicionales

16/12/2019

Un total de 72 creadores van participar dende mañana en Rosaleda d’Artesanos 2019, la feria de referencia del sector nel Principáu, que cada añu per estes feches entama y promueve’l Gobiernu d’Asturies, al traviés de la Conseyería d’Industria, Empléu y Promoción Económica.

La feria ye’l principal escaparate del sector y axunta a artesanos procedentes tanto de dellos llugares d’Asturies como d’otres rexones d’España. Anguaño celébrase la trentésima edición del certame, “lo que pon de manifiestu la fidelidá del públicu a esti eventu”, aseguró’l director xeneral de Comerciu, Entamadores y Economía Social, Julio González Zapico.

La Dirección Xeneral de Comerciu, Entamadores y Economía Social coordinó la organización de la feria, qu’un añu más celébrase nuna carpa asitiada n’El Campo San Francisco d’Uviéu de 1.200 metros cuadraos. Nesta ocasión, la feria va desenvolvese ente los díes 17 d’avientu y 5 de xineru del 2020 n’horariu diariu de 11:00 a 14:30 y de 16:30 a 21:00, sacante los díes 24 y 31 d’avientu, que va zarrar a les 19:30; y el 5 de xineru, que va abrir de 11:00 a 22:00 h.

L’oxetivu principal de Rosaleda d’Artesanos 2019 ye potenciar la conocencia de los productos y diseños realizaos n’Asturies y valir como plataforma pal desenvolvimientu del sector artesanu. “La realización d’esta feria n’años anteriores cumplió esta finalidá, intentando que nesta y n’ediciones posteriores se produza’l so afitamientu y la so vinculación con un artesanáu de calidá”, añedió González Zapico.

De forma paralela a la feria y dientro de la mesma carpa, va celebrase’l Concursu-esposición de Pieza Única, una muestra con una escoyerta d’obres d’alta calidá y valor artísticu creaes por maestros de l’artesanía. Trátase de pieces úniques desenvueltes coles más diverses concepciones y tendencies artístiques, pero nesque na so esencia ta siempre la busca de la orixinalidá. Al traviés d’estos gallardones, los artesanos llogren una reconocencia que proyecta la so sonadía artística y profesional dientro y fuera d’Asturies.

El fallu del concursu va dar a conocese’l sábadu 21 d’avientu, en coincidencia con una visita a la carpa del conseyeru d’Industria, Empléu y Promoción Económica, Enrique Fernández.

La Dirección Xeneral de Comerciu, Entamadores y Economía Social tien censaos nel Rexistru d’Actividaes Artesanes del Principáu d’Asturies a 224 artesanos nun total de 66 oficios. Los más numberosos son los xoyeros (32), ceramistes (25), marroquineros (23), carpinteros (17), tallistes de madera (14), acebacheros (13), vidreros (13), ebanistes (12), modistes/xastres (12), bisuteros (11), plateros (11), cuchelleros (11), repuxadores (11).

Anguaño, esti departamentu cunta con cuatro llinies d’ayudes a l’actividá artesana por importe de 145.000 euros que se dirixen a estes actuaciones: adecuación y meyora de los procesos productivos y de los talleres; asistencia a cursos y feries fuera d’Asturies; subvenciones a les asociaciones d’artesanos coles mires d’ameyorar la formación y los sistemes de comercialización; y fomentu de la celebración de feries comerciales y d’artesanía creativa.

   Icono gráfico alusivo al tipo de archivo Audiu (Audiu: 960 Kb) (n'español)

   Icono gráfico alusivo al tipo de archivo Cartel (Imagen: 677 Kb)

Información sobre el documento

© Copyright 2006. Gobiernu del Principau d'Asturies