Gobiernu del Principau d'Asturies

Asturies, muncho más cerca

Tas en

Asturias.es Temes Educación Educación ponse como prioridá garantizar la calidá de la ...
 

Educación

Educación ponse como prioridá garantizar la calidá de la enseñanza on line nel casu de que faiga falta interrumpir l’asistencia a les aules

La conseyería insta a les direcciones de los centros públicos a ellaborar un rexistru d’estudiantes con más dificultaes pa siguir el cursu de forma telemática. En bachilleratu y terceru y cuartu de secundaria la organización va poder ser semipresencial, con díes alternos na escuela

11/09/2020

La Conseyería d’Educación unvió güei a los centros públicos la circular de principiu de cursu. Esti documentu, que s’unvia tolos años, garra d’esta vuela una relevancia especial, dada la situación derivada de la pandemia del coronavirus. Asina, organiza tanto la vuelta presencial a les aules como prepara la docencia semipresencial y la virtual, en previsión d’un posible empeoramientu de l’andanciu. Pa la conseyería ye prioritario garantizar la continuidá de les enseñances en cualquier circunstancia y pa tol alumnáu. Con esti oxetivu, insta a les direcciones de los centros a ellaborar un rexistru del alumnáu con dificultaes pa siguir la enseñanza telemática. Tamién-yos pide qu’actualicen les llistes d’equipamientos y recursos informáticos.

L’actividá llectiva presencial, cola asistencia de tolos neños y neñes, ye la opción prioritaria. Les instrucciones precisen qu’Infantil y Primaria van organizase en grupos de convivencia estable de 20 alumnos, que van poder xugar y socializar ente ellos y que van recibir los sofitos preferentemente n’aula. Tamién l’alumnáu de primeru y segundu de Secundaria va asistir presencialmente y va organizase en grupos de convivencia estable de 20 estudiantes.

Los centros van asegurar la presencialidá na FP Básica y nel Programa de Meyora del Aprendimientu y Rindimientu (PMAR). Amás, va garantizase pal alumnáu en situación vulnerable, que nun disponga de conectividá o en riesgu de resquiebra dixital.

La organización de terceru y cuartu de Secundaria y Bachilleratu va ser semipresencial en díes alternos ellí onde nun se pueda garantizar la distancia de seguranza. Nesi casu, l’alumnáu va dir un día sí y ún non a la selmana y les clases van durar 45 minutos. Los grupos van ser lo más estables posibles y va intentase amenorgar los desplazamientos nos centros. En tolos niveles, dende Infantil a Bachilleratu, va asegurase la distancia mínima de 1,5 metros.



Plan de dixitalización en cada centru

La circular precisa que los equipos directivos han cuntar con un plan de dixitalización propiu, incluyir l’usu de les ferramientes tecnolóxiques nes actividaes educatives y incorporar les midíes p’atender al alumnáu que nun pueda asistir a les aules por motivos de salú o por aislamientu preventivu. Pa ellos han ellaborar planes de trabayu individualizaos.

La conseyería ponse nel casu de que l’andanciu empeore y fuercie a suspender les clases presenciales, como asocedió’l cursu pasáu. Por eso, la circular avisa a los centros que tienen que tar preparaos pa garantizar una eventual educación a distancia, total o parcial. Con esti propósitu, instruye a les direcciones pa qu’a lo llargo de les primeres selmanes revisen el material informático y los dispositivos que puedan ponese a disposición del estudiantáu. Pa quien presenten una situación más vulnerable va habilitase un sistema d’empréstamu.

Tamién nos primeros díes va primase la formación de les competencies dixitales pa manexar les plataformes que se van usar. Tol alumnáu ha disponer d’un aula nel entornu Teams o nes Aules Virtuales d’Educastur y manexar les aplicaciones disponibles en Microsoft 365.

Na so circular, la conseyería formula la necesidá de sacar provechu de la esperiencia del cursu pasáu: pide que se ponga una atención especial en quien s’atoparen en situación vulnerable por motivos familiares, sociales, económicos o pola resquiebra dixital. Amás, el profesoráu ha desenvolver planes de refuerzu y sofitu pa los que tengan más dificultaes d’aprendimientu y emocionales.

Los departamentos y les unidaes d’orientación y los equipos de tutores han diseñar programes d’acoyida y acompañamientu pa los primeros díes del cursu. Nellos han incluyir aspectos socioemocionales y de cohesión grupal, pa correxir posibles dificultaes derivaes del confinamientu.

Información sobre el documento

© Copyright 2006. Gobiernu del Principau d'Asturies