Gobiernu del Principau d'Asturies

Asturies, muncho más cerca

Tas en

Asturias.es El Principáu entrega los premios del II Certame Artísticu y ...
 

Aniciu

El Principáu entrega los premios del II Certame Artísticu y Lliterariu Corsino Suárez Miranda, que promueve’l compromisu col mediu ambiente y la llucha contra les quemes

Escolinos d’Infantil y Primaria de 46 centros educativos asturianos presentaron más de mil trabayos al concursu. El conseyeru de Presidencia entregó güei los gallardones a los diez estudiantes ganadores, que tamién visitaron les instalaciones del Serviciu d’Emerxencies en La Morgal

De izquierda a derecha: El gerente del Servicio de Emergencias del Principado de Asturias Sepa, Eugenio García; el director de división de Protección Civil e Incendios Forestales Eliance, Julián Ríos; el consejero de Presidencia y Participación Ciudadana, Guillermo Martínez; y el director general de Ordenación Académica e Innovación Educativa, Francisco Laviana

18/06/2019

El conseyeru de Presidencia y Participación Ciudadana, Guillermo Martínez, entregó güei en La Morgal los premios del II Certame Artísticu y Lliterariu Corsino Suárez Miranda, que promueve’l compromisu col mediu ambiente y la llucha contra les quemes forestales ente l’alumnáu d’Infantil y Primaria.

Na so intervención, Martínez valoró’l grau tan altu de concienciación qu’amosó la comunidá escolar y tamién la participación tan elevada nel concursu, que quier implicar a les xeneraciones más moces nel cuidáu de la naturaleza. Nesti sentíu, esplicó qu’al certame presentáronse 1.056 trabayos de 46 centros educativos.

“L’amenorgamientu de riesgos pa la nuestra contornada ha ser una responsabilidá compartida, porque’l mediu natural constituye un patrimoniu común que tola ciudadanía ta obligao a caltener. Por eso ye importante reforzar les acciones de sensibilización y promover actitúes cíviques énte esti retu común”, apuntó’l titular de Presidencia.

Nel actu d’entrega participaron tamién el director xeneral d’Ordenación Académica y Innovación Educativa, Francisco Laviana, y Julián Ríos, director de división de Protección Civil y Quemes Forestales d’Eliance, entidá patrocinadora de los gallardones.

Los estudiantes distinguíos visitaron les instalaciones del Serviciu d’Emerxencies del Principáu (Sepa) en La Morgal pa conocer el trabayu del centru de coordinación d’emerxencies del 112 Asturies. Tamién pasaron peles instalaciones del parque de Bomberos d’Asturies, onde pudieron contemplar los vehículos d’intervención qu’atienden les emerxencies. El so percorríu remató nel campu d’entrenamientos, con una exhibición de la Unidá Canina de Rescate y del grupu de rescate con helicópteros.

El conseyeru esplicó a los estudiantes que la sala del 112 recibió más de 200.000 llamaes nos primeres cuatro meses d’anguaño, un periodu nel que los bomberos realizaron más de 2.000 salíes p’apagar quemes forestales o urbanes.



Modalidaes del concursu y premiaos

El certame artísticu y lliterariu constaba de cuatro modalidaes distintes:

   - Modalidá A (Infantil) y modalidá B (1.u y 2.u de Primaria): creación d’una obra plástica o dibuxu con técnica llibre.
   - Modalidá C (3.u y 4.u de Primaria) y modalidá D (5.u y 6.u de Primaria): ellaboración d’un rellatu curtiu ilustráu.
   - El fallu del xuráu, integráu por representantes de la Conseyería d’Educación y Cultura y del Sepa, producióse’l 29 de mayu, depués de la valoración de les redacciones y los dibuxos presentaos, y los ganadores son estos:
   - Modalidá A (alumnáu d’Infantil)
   - Primer premiu: Cuidemos los bosques, de Thelma Cuetos Rubio, alumna de la Escuela Pública Maximiliano Arboleya, de Llaviana.
   - Segundu premiu: No queméis los bosques, de Julia Suárez Álvarez, alumna de la Escuela Pública Bernardo Gurdiel, de Grau.
   - Modalidá B (alumnáu de 1.u y 2.u de Primaria)
   - Primer premiu: pal trabayu ensin títulu presentáu por Illán Díaz García, estudiante de la Escuela Pública Elena Sánchez Tamargo, de Llaviana.
   - Segundu premiu: El bosque es vida, de Verónica Suárez Barbón, alumna de la Escuela Pública Elena Sánchez Tamargo, de Llaviana.
   - Modalidá C (alumnáu de 3.u y 4.u de Primaria)
   - Primer premiu: El ciclo de la fatalidad, de Sara Díaz García y Ángela Fernández Cueto, alumnes de la Escuela Pública Martimporra, de Bimenes.
   - Segundu premiu: Mi güelina Lola, d’Alicia Rodríguez Díaz y Aarón Megido Cárdena, estudiantes de la Escuela Pública Bello, d’Ayer.
   - Modalidá D (alumnáu de 5.u y 6.u de Primaria)
   - Primer premiu: Di no al fuego, de Pablo Gutiérrez Fernández, alumnu de la Escuela Pública Santa Bárbara, d’Ayer.
   - Segundu premiu: Lunares y el fuego, d’Alejandro Fernández Barrero, alumnu de la Escuela Pública Ventanielles, d’Uviéu.

Amás del diploma acreitativu, los gallardonaos recibieron un cheque regalu pa l’adquisición de material educativo y informático, igual que les sos escueles respectives.

 

   Icono gráfico alusivo al tipo de archivo Audiu (Audiu: 1 Mb) (n'español)

Información sobre el documento

© Copyright 2006. Gobiernu del Principau d'Asturies