Gobiernu del Principau d'Asturies

Asturies, muncho más cerca

Tas en

Asturias.es Gobiernu Actualidá La Conseyería d'Industria recibió 9.975 solicitúes d'espedientes ...
 

Actualidá

La Conseyería d'Industria recibió 9.975 solicitúes d'espedientes de regulación d'empléu desque empezó la crisis sanitaria

El Serviciu de Rellaciones Llaborales tramitó yá 4. 550, qu'afecten a 16. 654 persones. El Gobiernu d'Asturies celebra la primer xunta de la comisión de siguimientu colos axentes sociales p’analizar la evolución de los ERTE. El director xeneral d'Empléu destaca'l compromisu y el trabayu de los emplegaos públicos pa entainar la xestión

07/04/2020

La Conseyería d'Industria, Empléu y Promoción Económica recibió dende'l 11 de marzu y hasta primer hora de la tarde d'ayeri 9.975 solicitúes d'espedientes de regulación temporal d'empléu (ERTE) rellacionaos cola crisis sanitaria del coronavirus. D’alcuerdu colos datos facilitaos pol Serviciu de Rellaciones Llaborales de la Dirección Xeneral d'Empléu y Formación, tramitáronse yá un total de 4.550, qu'afecten a 16.564 persones.

Estos datos fueron comunicaos esta mañana a los axentes sociales y económicos mientres la primer xunta de la comisión impulsada pol Gobiernu d'Asturies p'analizar el siguimientu de los espedientes de regulación temporal d'empléu presentaos nel Principáu.

El director xeneral d'Empléu y Formación, Pedro Fernández-Raigoso, señaló que la elevada cifra d’ERTE tramitaos pon de manifiestu “el compromisu y l'importante trabayu realizáu pol personal del Serviciu de Rellaciones Llaborales y de la Dirección Xeneral d'Estratexa Dixital, mesmo que les midíes de refuerciu de personal y meyora de los procedimientos pa entainar la xestión de los miles de solicitúes recibíes”.

No que fai a los ERTE tramitaos, 4.407 respuenden a causes de fuerza mayor (el 96,85 %) y impliquen a 15.821 trabayadores, mentes qu'otros 143 débense a causes económiques, técniques, productives y organizativas y afecten a 783 emplegaos. Pa los primeros, el númberu de díes de suspensión por promediu ye de 30, el mesmu periodu marcáu pal estáu d'alarma. Pal restu, ye de 90 díes.

Hostelería y hotelería, servicios de restauración y catering a instituciones; peluqueríes y otros tratamientos asemeyaos, amás d'empreses de pequeñu comerciu caltiénense a la cabeza como los sectores con más espedientes tramitaos y envalórase qu'acopen tamién la mayoría del total d’ERTE presentaos.

Tres les primeres selmanes d'estáu d'alarma y de paralización de bona parte de l'actividá económica, la Dirección Xeneral d'Empléu y Formación detectó un menor ritmu de presentación d’ERTE. Asina, el pasáu 31 de marzu'l cómputu global yera de 9.170 espedientes, frente a los 9.975 actuales.

TOTAL D’ERTES PRESENTAOS (11 de marzu-6 d’abril) 9.975

 



TOTAL D’ERTES TRAMITAOS

TOTAL POR FUERCIA MAYOR POR OTRES CAUSES
NÚMB. ERTES 4.550 4.407 143
NÚMB. TRBAYADORES AFECTAOS 16.654 15.821 743
NÚMB. MEDIU DE DIES DE SUSPENSION 30 90

 

Información sobre el documento

© Copyright 2006. Gobiernu del Principau d'Asturies