Gobiernu del Principau d'Asturies

Asturies, muncho más cerca

Tas en

Asturias.es El conseyeru d'Empléu destaca l'esfuerciu del Principáu pa ...
 

Aniciu

El conseyeru d'Empléu destaca l'esfuerciu del Principáu pa facilitar la dixitalización de les empreses rexonales

Isaac Pola participa na xornada entamada pol Grupu Idepa y Gdp Legal p’analizar los retos xurídicos que plantega'l desenvolvimientu tecnolóxicu nos ámbitos llaboral y mercantil. El Gobiernu d'Asturies destinó 7,6 millones nos postreros dos años a promover la implantación de tecnoloxíes nueves nel sector empresarial

El consejero de Empleo, Industria y Turismo, Isaac Pola, durante la presentación de la jornada

09/11/2018

El conseyeru d'Empléu, Industria y Turismu destacó güei’l llabor intensu que realiza'l Principáu en materia de financiamientu, asesoramientu y divulgación de la estratexa Asturies Industria 4.0, cola que pretende facilitase la dixitalización de les empreses. Isaac Pola participó nuna xornada coorganizada pol Grupu Idepa y GdP Legal para encarar los aspectos xurídicos rellacionaos cola innovación y la implantación de tecnoloxíes nueves nel sector empresarial.

Mientres la so intervención, señaló que l'Executivu autonómicu destinó 7,6 millones nos dos años últimos a promover el desenvolvimientu tecnolóxicu de les firmes de la rexón. D'esta partida, 6,9 millones dirixiéronse directamente al texíu empresarial al traviés de distintes convocatories de subvenciones que xestiona l'Institutu de Desenvolvimientu Tecnolóxicu del Principáu (Idepa). En total, 119 firmes beneficiáronse d'estes ayudes, que facilitaron la puesta en marcha de 162 proyectos y van xenerar inversiones próximes a los 18,7 millones.

Amás del sofitu financieru, desenvolviéronse actuaciones d'asesoramientu y divulgación al traviés de los centros tecnolóxicos, la rede de centros d'acompañamientu tecnolóxicu y innovación y el Grupu Idepa. Ente estes midíes, inclúyese la puesta en marcha de la web www.asturiasindustria40.es que, amás de divulgar información, cunta con un llistáu d’habilitadores tecnolóxicos que pueden ayudar a les empreses na so dixitalización.

Pola tamién citó l'informe Bankia índicex 2017, qu'asitia a les empreses asturianes a la cabeza en desenvolvimientu tecnolóxicu, superando a les de comunidaes de la redolada, como Galicia o País Vascu, y asitiándose al mesmu nivel que les de Cantabria y Castiella y Llión.

Tres l'actu inaugural de la xornada, nel que participó tamién el sociu director de GdP Llegal, Juan Jesús Menéndez, profesionales del bufete van analizar los elementos normativos fundamentales pa la protección, aprovechamientu y esplotación comercial de los activos intanxibles de les empreses; esto ye, d'aquellos bienes que nun son físicos, como marques, permisos, patentes, etcétera.

La próxima sesión informativa impulsada pol Grupu Idepa, que va xirar en redol a la realidá virtual y la realidá aumentada na industria, va tener llugar el xueves próximu nel Parque Científicu Tecnolóxicu de Xixón.

   Icono gráfico alusivo al tipo de archivo Audiu (Audiu: 2 Mb) (n'español)

Información sobre el documento

© Copyright 2006. Gobiernu del Principau d'Asturies