Gobierno del Principado de Asturias

Asturias, mucho más cerca

Estás en

Aniciu Gobiernu Actualidá Un total de 972.197 asturianos, el 12% de los que viven nel ...
 

Actualidá

Un total de 972.197 asturianos, el 12% de los que viven nel estranxeru, van poder votar en les elecciones autonómiques del 26-M

Na xornada electoral van habilitase 1. 573 meses en 615 locales para escoyer a los 45 diputaos de la Xunta Xeneral: 34 pola circunscripción central, 6 pola occidental y 5 pola oriental. El Gobiernu del Principáu destina 2,7 millones a la celebración d'estos comicios, de los que 1,2 costeen les subvenciones a los partíos políticos. La campaña institucional, con un costu de 35. 000 euros, diríxese puramente a informar y non a promover el votu

02/04/2019

Un total de 972.197 asturianos van poder exercer el so derechu a votu nes elecciones autonómiques que van tener llugar el 26 de mayu, en coincidencia colos comicios municipales y europeos. D'ellos, 854.971 moren nel Principáu y 117.226 (12%), nel estranxeru. Respectu al mesmu procesu electoral celebráu en 2015, el censu rexistra un amenorgamientu de 15.852 persones, lo que supón descensu del 1,6%.

Del censu d'electores nel estranxeru, que la so cifra global crez un 10% al respective de 2015, el 78,3% provienen d'América, con 91.746, y alredor al 20%, d'Europa. La mayor presencia d'asturianos con derechu a votu nel continente americanu concéntrase n’ Arxentina (33%) y México (22%).



Nu DE ELECTORES POR CONTINENTE

Continente 2015 2019 Diferencia
Nu absolutu Porcentaxe
América 83.315 91.746 8.431 10,1%
Europa 21.660 23.632 1.972 9,1%
Oceanía 851 934 83 9,75%
Asia 538 679 141 26,2%
Äfrica 229 235 6 2,6%
Total 106.593 117.226 10.633 9,97%

 

El conseyeru de Presidencia y Participación Ciudadana, Guillermo Martínez, facilitó güei estos datos y cifráu en 2.765.000 euros la partida que'l Gobiernu asturianu va dedicar a la celebración de les elecciones a la Xunta Xeneral. Del total de los fondos, 1.205.000 euros van ser pa subvenciones a los partíos políticos y 1.560.000 van financiar, ente otres actuaciones, los contratos de suministros, sobres y actes, y l'espardimientu de resultaos.

Amás, van destinase 35.000 euros a la campaña d'información institucional pa informar a la ciudadanía sobre los principales aspectos de la xornada electoral, dende la fecha de los comicios y el procedimientu pa votar hasta los requisitos y trámites del votu per corréu. L'Executivu sacó a llicitación la campaña, dirixida puramente a informar y non a promover el votu, que va incluyise n'espacios gratuitos de medios de comunicación de titularidá pública y va cuntar con distintos soportes: spot de televisión, cuñas radiofóniques, banner pa webs, anuncios de prensa en diversos formatos, redes sociales y mupis. Les empreses interesaes van poder presentar les sos ufiertes hasta'l 12 d'abril.



Cifres electorales

En total, el 26 de mayu van habilitase 1.573 meses en 615 locales pa escoyer a los 45 diputaos del Parlamentu asturianu: 34 pola circunscripción central, 6 pola occidental y 5 pola oriental. Como ye vezu, la campaña electoral va durar quince díes, dende les cero hores del 10 de mayu hasta les venticuatro hores del 24.

A partir de güei y hasta la celebración de los comicios, les feches más importantes del calendariu electoral son les siguientes:

 Plazu de solicitú del votu per corréu: del 2 d'abril al 16 de mayu.

 Plazu de solicitú del votu accesible: del 2 al 29 d'abril.

 Plazu de solicitú del votu pa electores residentes nel estranxeru o temporalmente ausentes: del 2 al 27 d'abril.

 Constitución de les xuntes electorales: 5 d'abril.

 Plazu de presentación de les candidatures énte la Xunta Electoral Provincial d'Asturies: del 17 al 22 d'abril.

 Prohibición de publicación, espardimientu o reproducción de sondeos electorales: del 21 al 25 de mayu.

Tocantes a la xestión del procesu electoral, y al igual que nos comicios de 2015, les tabletes van ser los dispositivos electrónicos que se van utilizar pal espardimientu y publicación de los resultancios provisionales, polo que se van repartir 701 unidaes. Por cuenta de la concurrencia de trés procesos nuna mesma xornada, cada representante electoral va utilizar dos tabletes: una suministrada pol Ministeriu del Interior pa la recoyida de datos de los comicios al Parlamentu Europeo y local y otra pol Principáu pa la recoyida de datos de los autonómicos.



Elecciones a parroquies rurales

Como novedá, el Gobiernu del Principáu convoca tamién anguaño les elecciones a 39 parroquies rurales de quince conceyos. Hasta agora yera l'Alministración central la que convocaba les elecciones a entidaes locales menores. Sicasí, un cambéu postuláu pol Ministeriu de Política Territorial, con base nel alcuerdu de la Xunta Electoral Central 3/2019, de 23 de xineru, establez que les comunidaes tienen d'asumir esa competencia. El procesu electoral va ser xestionáu pola Delegación del Gobiernu n'Asturies.

Martínez estimó “la profesionalidá y el rigor” del personal del Principáu y del restu d'alministraciones públiques y entidaes que collaboren nel desarroluu de les elecciones y espresó el so enfotu en que “la normalidá seya la tónica” el próximu 26 de mayu.

Nesti procesu, al Gobiernu d'Asturies correspuénden-y siete funciones esenciales, amás de la mesma convocatoria de los comicios, na que s'afita la fecha d'entamu de la campaña electoral:

 La realización d'una campaña informativa de calter institucional, dotada con 35.000 euros y que'l so plazu de solicitú d'ufiertes remata'l 12 d'abril.

 La designación de representantes de l'Alministración del Principáu nes meses electorales.

 El sofitu a les xuntes electorales.

 La provisión a l'alministración electoral de los medios personales y materiales necesarios, la disponibilidá de papeletes y sobres electorales y la fixación de les compensaciones económiques de los sos miembros y del personal al so serviciu.

 Apurrir información provisional sobre los resultaos de la elección.

 Otorgar les subvenciones a les organizaciones polítiques concurrentes.

Tola información referida a les elecciones a la Xunta Xeneral del Principáu puede consultase dende güei nel siguiente enllaz https://asturias.infoelecciones.es y va crease una aplicación de móvil pa consultar los resultaos provisionales del escrutiniu na nueche electoral.

 

Información sobre el documento

© Copyright 2006. Gobierno del Principado de Asturias