Gobierno del Principado de Asturias

Asturias, mucho más cerca

Estás en

Aniciu El colectivu Offmothers gana la tercer edición del Premio Muséu ...
 

Aniciu

El colectivu Offmothers gana la tercer edición del Premio Muséu Barjola col proyectu Con la casa a cuestas

La propuesta, creada pa la so esposición na capiya de La Trinidad, axunta dibuxos, fotografíes, pieces sonores, videu, perfomance y instalaciones de seis artistes asturianes

19/07/2019

El proyectu Con la casa a cuestas, del colectivu Offmothers, foi gallardonáu col Premiu Muséu Barjola que concede'l Gobiernu d'Asturies y al qu'aspiraben na fase final de la so tercer edición una ventena de trabayos.

El xuráu, presidíu pol viceconseyeru de Cultura y Deporte, Vicente Domínguez, y formáu polos directores del Pentágono del Arte, destacó la condición de “propuesta interdisciplinar” del proyectu, centráu en deconstruyir la identificación histórica de la muyer col llar y qu'ufierta una mirada nueva dende distintes perspectives p’analizar la esperiencia de ser muyer y artista”.

Con la casa a cuestas ye, según el xuráu, “un proyectu con una llinia d'investigación estrechamente venceyada al arte feminista y materializada nuna esposición específica pa la capiya de La Trinidad al traviés de distintes pieces producíes pol colectivu”. La propuesta axunta instalaciones, dibuxos, fotografíes, pieces sonores, videu y perfomance.

El colectivu Offmothers ta integráu poles artistes María Elena de la Puente (Uviéu, 1969), Susana Carro (Mieres, 1971), Natalia Pastor (La Pola Llaviana, 1970), Roxana Popelka (Xixón, 1966), Gema Ramos (Uviéu, 1969) y Eugenia Tejón (Morea, 1968).

El Premiu Muséu Barjola, creáu nel 2016 pola Viceconseyería de Cultura a propuesta de la comisión de coordinación d'equipamientos artísticos del Principáu, ye un premiu destináu a artistes d'Asturies o residentes na comunidá, dotáu con 5.000 euros y la edición del catálogu. El so oxetivu ye la realización d'un proyectu espositivu que s’incardine na capiya de La Trinidad, allugada nel equipamientu museísticu.

Nes dos primeres ediciones del premiu fueron gallardonaos Carlos Suárez, por Cita con la historia, y Cristina Busto, por Antimapping.

Información sobre el documento

© Copyright 2006. Gobierno del Principado de Asturias