Gobierno del Principado de Asturias

Asturias, mucho más cerca

Estás en

Aniciu Temes Ganadería Información sobre ayudes La Conseyería de Desenvolvimientu Rural va destinar anguaño ...
 

Información sobre ayudes

La Conseyería de Desenvolvimientu Rural va destinar anguaño cuasi 150.000 euros a caltener la raza de ganáu vacuno asturiana del monte

María Jesús Álvarez destaca les 17. 000 hectárees nueves de pastu comunal que’l Principáu punxo a disposición de los profesionales p’aumentar la competitividá de les esplotaciones y les ayudes de la PAC. El Gobiernu d’Asturies redució al 0,17 % la tuberculosis bovina, mentes que la prevalencia a nivel nacional algama’l 2,87 %

D'esquierda a derecha na visita a ún de los puestos: El director xerente del Serida, Ramón Juste;el alcalde de Cabranes, Gerardo Fabián; y la conseyera de Desenvolvimientu Rural y Recursos Naturales, María Jesús Álvarez

14/05/2017

La Conseyería de Desenvolvimientu Rural y Recursos Naturales va destinar anguaño una partida de 149.900 euros a l’Asociación Española de Criadores de Ganáu Vacuno Selecto de Raza Asturiana del Monte (Aseamo), un 8 % más que nel 2016, p’ayudar a caltener el llibru xenealóxicu, la promoción y el desenvolvimientu de los programes de caltenimientu de los exemplares, según anunció güei la titular d’esti departamentu, María Jesús Álvarez.

La conseyera, qu’asistió en L’Infiestu (Piloña) a la clausura del 30.u Concursu y Puya de la Raza Asturiana del Monte, tamién llamada casina, destacó’l compromisu firme del Gobiernu d’Asturies col caltenimientu y la meyora xenética de la producción ganadera y reconoció’l trabayu desenvueltu nos últimos años polos criadores. “Esta raza pasó de tar en peligru d’estinción a cuntar con una presencia curiosa nel territoriu, sobre manera na zona oriental y nos montes del área central”, sorrayó.

Nesti sentíu, indicó qu’anguaño 20.831 animales de 649 criadores figuren inscritos en llibru xenealóxicu, lo que, al so paecer, “pon de manifiestu que l’esfuerciu de los criadores, col sofitu del Principáu, ta dando resultaos na recuperación d’un animal perbién afechu al terrén y con característiques singulares que, amás, forma parte de la Indicación Xeográfica Protexida Xata d’Asturies”.

El censu total d’exemplares d’asturiana del monte na comunidá autónoma ye de 25.643.

“Esta raza atópase integrada dende tiempos inmemoriales nel paisaxe y ecosistema asturianos, cumpliendo una función importante de caltenimientu del mediu y ayudando en bona midida a la fixación de población n’árees de monte”, sorrayó’l titular de Desenvolvimientu Rural.

Tamién felicitó a los profesionales del campu asturianu pol so llabor pa consiguir que nun se pierda “una riqueza xenética patrimonial propia” y llograr, coles mesmes, “estándares de calidá bien altos nes producciones”. Según manifestó, “la recuperación y caltenimientu d’estes races autóctones ayuda tamién a la necesaria diversificación y a crear riqueza y empléu nel mediu rural”.

 

Saniamientu

La conseyera aseguró que’l saniamientu ganaderu ye “fundamental” pa la xestión de les esplotaciones y la capacidá de los productores d’adaptase a un mercáu complexu global. Amás, destacó qu’Asturies tien una cabana en bones condiciones y que se consiguió amenorgar l’índiz de prevalencia de la tuberculosis bovina al 0,17 %, un datu que garra más relevancia si se compara cola media nacional, del 2,87 %. Tamién recordó que la Unión Europea declaró anguaño la comunidá llibre de brucelosis bovina.

Álvarez valoró les 17.000 hectárees nueves que’l so departamentu punxo anguaño a disposición de los ganaderos en pastu comunal, que van favorecer la competitividá de les esplotaciones y van aumentar la capacidá de percibir fondos europeos de la Política Agrícola Común (PAC).

“Dende la conseyería desenvolvimos los reglamentos comunitarios que dexen caracterizar pastu comunal que se xestiona con métodos tradicionales. Somos la única comunidá autónoma que lo fixo y quiciabes la única rexón europea”, señaló.

 

   Icono gráfico alusivo al tipo de archivo Audiu (Audiu: 2 Mb) (n'español)

Información sobre el documento

© Copyright 2006. Gobierno del Principado de Asturias