Gobiernu del Principau d'Asturies

Asturies, muncho más cerca

Tas en

Asturias.es Temes Industria y enerxía El Gobiernu d'Asturies aboga pola concertación social como ...
 

Industria y enerxía

El Gobiernu d'Asturies aboga pola concertación social como modelu de gobernanza pa encarar la transición escontra una economía baxa en carbonu

El vicepresidente asegura nel Cume del Clima que'l pactu ente trabayadores, sindicatos y empresarios “ye agora más aplicable que nunca”. Juan Cofiño participa en Madrid nun actu xunto a los representantes de los axentes sociales y económicos de la comunidá. El Principáu impulsa la Comisión d'Acción pol Clima pa incorporar esta prioridá en toles polítiques del Executivu

De izquierda a derecha, el secretario general de CCOO Asturias, José Manuel Zapico; la viceconsejera de Medio Ambiente y Cambio Climático, Nieves Roqueñí; el vicepresidente, Juan Cofiño; el secretario general de UGT Asturias, Javier Fernández Lanero; y el presidente de Femetal, Guillermo Ulacia

10/12/2019

El vicepresidente del Gobiernu y conseyeru d'Infraestructures, Mediu Ambiente y Cambéu Climáticu, Juan Cofiño, abogó pola concertación social n'Asturies como la meyor fórmula de gobernanza pa encarar la transición escontra una economía de baxes emisiones de carbonu. Destacó la importancia de que trabayadores, empresarios y Gobiernu del Principáu analicen xuntos “los mecanismos y proyectos que debemos de poner en marcha pa nun errar na estratexa”.

Cofiño, que realizó estes declaraciones mientres la presentación del Modelu de gobernanza rexonal pa la transición climática d'Asturies, realizáu güei nel marcu del Cume del Clima (COP25) que se celebra en Madrid, sorrayó que la concertación foi “un elementu diferencial que dexó a Asturies encarar les crisis económiques de les que salimos con un modelu d'alcuerdu social que queremos poner en valor”. Nesti sentíu, indicó que los principios de la concertación “son agora más aplicables que nunca porque tenemos que ser capaces d'identificar tolos impactos negativos a los que vamos tener que responder na transición económica y toles oportunidaes qu'hemos favorecer pa siguir apostando pol progresu y económicu y el bienestar social”.

N'afirmando que'l territoriu del Principáu ye menos vulnerable al cambéu climáticu pola so situación xeográfica y orográfica, Cofiñu señaló, sicasí, que la comunidá resulta bien sensible a los impactos de la crisis del clima sobre la economía, “poles característiques del so texíu industrial, bien intensivu n'emisiones de gases d'efectu invernaderu, y pola existencia d'un parque de centrales termoeléctriques basaes en combustibles fósiles”.

Amás, señaló que la descarbonización de la economía afecta a sectores amplios, non solo al enerxéticu y a la minería, “sinón tamién al del cementu, la siderurxa y la metalurxa, el sector químicu o'l tresporte, toos ellos con presencia na nuestra rexón y, por tanto, altamente afectaos”. Ente los ámbitos que pueden salir beneficiaos citó'l turísticu, pola suavización de temperatures; l'agrariu y forestal y, en xeneral, el rellacionáu col usu de biomasa, que puede aumentar la so productividá.

El Gobiernu d'Asturies defende una transición productiva “xusta y inclusiva”, anque'l conseyeru apuntó que “nun va ser bono de consiguir que sía pausada, a la vista d'indicadores como la evolución de les emisiones de gases d'efectu invernaderu o la cayida de la xeneración eléctrica con carbón”. Añedió qu'estos datos ”marquen un enclín qu'indica que la descarbonización tien un ritmu muncho más rápido de lo que se marcó na fueya de ruta española presentada a Europa”, polo que'l Principáu ta obligáu a responder “con más axilidá y audacia que n'otros llugares pa que la crisis climática nun traiga de resultes una crisis económica social”.

Cofiño repasó la fueya de ruta de la UE escontra la neutralidá climática nel 2050. N’ámbitu industrial, apostó por un respaldu a la industria al traviés del meyor marcu regulatoriu posible pa que nin la producción nin los productos veanse gravaos por un costu medioambiental qu'otros países, que nun empecipiaron entá la so transición ecolóxica, nun apliquen.

Refirióse tamién a les “necesaries partíes económiques que tienen d'incorporase añu a añu nos presupuestos pa responder afechiscamente a los efectos del cambéu climáticu y prevenir y desaniciar les consecuencies d'una meteoroloxía más estrema y que previsiblemente va ser cada vez más frecuente”.

N’ámbitu de les infraestructures, la defensa énte hinchentes y aveníes en zones fluviales, la protección de la mariña y de les infraestructures portuaries o la prevención d’argayos “van ser capítulos a los que va haber que destinar recursos crecientes”, aseguró. Y espunxo, igualmente, la necesidá de dedicar recursos adicionales pa responder a la mayor virulencia de plagues y especies invasores o a episodios como foles de calor o situaciones meteorolóxiques que favorezan una mala calidá del aire, nel área de sanidá.

El vicepresidente resaltó que'l Gobiernu d'Asturies ta trabayando yá pa crear la Comisión de Coordinación d'Acción pol Clima n'Asturies, que'l so cometíu va ser el diseñu de la fueya de ruta d'una estratexa de gobiernu pa integrar tresversalmente el cambéu climáticu en toles polítiques. “Cuntar colos axentes sociales pa desenvolver esa estratexa ye imprescindible y creemos demostrar que tenemos un puntu de partida inmeyorable na concertación”, remachó.

Nel actu intervinieron los secretarios xenerales d’UXT Asturies, Javier Fernández Lanero, y de CC. OO. Asturies, Jose Manuel Zapico, y el vicepresidente de la Federación Asturiana d'Empresarios (Fade), Guillermo Ulacia, y cuntó tamién cola participación de la viceconseyera de Mediu Ambiente y Cambéu Climáticu, Nieves Roqueñí.

   Icono gráfico alusivo al tipo de archivo Audiu (Audiu: 2 Mb) (n'español)

Información sobre el documento

© Copyright 2006. Gobiernu del Principau d'Asturies