Gobiernu del Principau d'Asturies

Asturies, muncho más cerca

Tas en

Asturias.es Muyeres La supervivencia de les muyeres asturianes de 45 a 64 años ...
 

Muyeres

La supervivencia de les muyeres asturianes de 45 a 64 años diagnosticaes con cáncer de mama algama'l 92%

Cada añu detéctense cerca de 800 nuevos casos d'esti tumor nel Principáu. Más del 75% de la población diana participa nel programa de detección precoz

18/10/2019

La supervivencia de les muyeres de 45 a 64 años con cáncer de mama algama n'Asturies el 92% al llustru del diagnósticu, según el Rexistru de Tumores del Principáu, dependiente de la Conseyería de Salú. Nos últimos exercicios amenorgóse la mortalidá por esta causa en toles franxes d'edá, especialmente ente les más moces.

Anguaño rexístrense cerca de 800 nuevos casos añales nel Principáu, lo que convierte al de mama nel tumor más frecuente ente les muyeres.

Les campañes de detección temprana fixeron posible el diagnósticu n'estadios más tempranos. Más del 75% de la población diana; esto ye, muyeres de 50 a 69 años, participa nel programa de detección precoz, que consiste na realización d'una mamografía.

Con esta prueba detéctase la patoloxía en cuatro muyeres de cada mil que participen nel programa. El 70% d'elles nun tien afectación de ganglios y unu de cada trés tumores mide menos d'un centímetru, lo que trai un meyor pronósticu y tratamientos menos agresivos.

La Conseyería de Salú actualizó la información sobre esti peneráu, que per primer vegada reflexa los sos resultaos p'ayudar a les muyeres a decidir sobre la so participación nel programa.

Esti añu yá se repartieron más de 13.000 folletos nes distintes zones sanitaries, a les que se va sumar nes próximes selmanes l’área III, que correspuende a Avilés y contorna.

Per otra parte, Asturies va acoyer el 39º Congresu de la Sociedá Española de Senoloxía y Patoloxía Mamaria, que se va celebrar n'Uviéu n'ochobre de 2020, y nel que van participar unos 600 especialistes de too el país.

Información sobre el documento

© Copyright 2006. Gobiernu del Principau d'Asturies