Gobiernu del Principau d'Asturies

Asturies, muncho más cerca

Tas en

Asturias.es Families Nel cole Más de 9.000 escolinos van beneficiase esti cursu del programa ...
 

Nel cole

Más de 9.000 escolinos van beneficiase esti cursu del programa de distribución gratuita de lleche y yogures en centros educativos

L’oxetivu d’esti proyectu, al que se destinen 76. 000 euros, ye ayudar a ameyorar los vezos alimenticios del alumnáu. El Bopa publica güei la convocatoria d’ayudes pa empreses interesaes en collaborar nesta iniciativa, financiada con fondos Feaga

13/09/2019

La Conseyería de Desenvolvimientu Rural, Agroganadería y Pesca, en collaboración colos departamentos d’Educación y Salú, punxo en marcha’l programa européu de fomentu del consumu de lleche nesti cursu, del que se van beneficiar 9.174 estudiantes de 93 centros asturianos.

L’oxetivu d’esti programa, financiáu con 76.000 euros pa esti añu académicu, ye favorecer la meyora de los vezos alimenticios y una nutrición saludable del alumnáu, cola mira de menguar la obesidá y enfermedaes asociaes. La iniciativa ta dirixida a menores de 3 a 16 años, que van recibir nos mesmos centros educativos lleche pasteurizao o UHT, yogures naturales ensin azucre añedío nin edulcorantes.

La implicación y collaboración del profesoráu que participa ye fundamental pal éxitu del programa, impulsáu pola Unión Europea y que se pon en marcha’l segundu añu siguíu. Nesti periodu, el númberu d’escolinos participantes aumentó en más del 57 %.

Dau l’aumentu del númberu de centros y alumnos inscritos, tamién aumentó’l presupuestu del programa, financiáu al traviés del Fondu Européu Agrícola de Garantía (Feaga), al pasar de los 34.302 euros del cursu pasáu hasta los 76.000 d’esti.

El Boletín Oficial del Principáu (Bopa) publica güei la convocatoria empobinada a les empreses interesaes en participar na distribución gratuita de lleche nos centros escolares.

Esta iniciativa de promoción de vezos saludables con repartu de lleche pasteurizao o lleche UHT y yogures va complementase col programa de distribución gratuita de fruta, hortolices y plátanu nos centros, implantáu dende’l 2014 y que se va desenvolver a partir de febreru. Nel cursu pasáu participaron cuasi 22.000 estudiantes de 176 centros.

 

Información sobre el documento

© Copyright 2006. Gobiernu del Principau d'Asturies