Gobiernu del Principau d'Asturies

Asturies, muncho más cerca

Tas en

Asturias.es Temes Salú L’Observatoriu de Salú consolídase como una ferramienta útil pa ...
 

Salú

L’Observatoriu de Salú consolídase como una ferramienta útil pa impulsar meyores nes condiciones de vida de la población

Esti órganu foi clave nel diseñu de les polítiques de planificación sanitaria pa los próximos años y como asesor de los conceyos. Cada euru invertíu en promoción de bonos vezos permite recuperar hasta 23 pol aumentu de la calidá de vida de les persones y el menor usu de los servicios asistenciales

De izquierda a derecha, Óscar Suárez, técnico del Observatorio de Salud; Antonio Molejón, director general de Salud Pública, y Rafael Cofiño, jefe de Servicio de Evaluación de la Salud y programas de la Consejería de Sanidad

04/07/2019

L'Observatoriu de Salú p’Asturies (Obsa), una iniciativa de la Conseyería de Sanidá que nació en 2010 pa promover polítiques públiques, acciones comuñales y vezos saludables, consolídase como una ferramienta útil p’algamar estos oxetivos y avanzar na meyora de les condiciones de vida de la población.

El proyectu foi perfeccionándose col tiempu hasta algamar una bona reputación nacional ya internacional y, amás, llogró notables meyores nos trabayos d'información epidemiolóxica y na acción comuñal al traviés del proyectu Asturias actúa. Tamién foi clave na ellaboración de programes y documentos como la Llei de Salú, el Plan de Salú, el Plan Sociosanitariu 2018-2021 y la Estrategia para un nuevo enfoque de la atención primaria que van marcar la planificación sanitaria nos próximos años.

El director xeneral de Salú Pública, Antonio Molejón, presentó güei la Evaluación del Observatorio de Salud 2017-2018 y destacó el trabayu d'esti órganu como asesor de les polítiques de promoción de la salú de distintos conceyos.

Dalgunos de los efectos d'eses polítiques yá se pueden cuantificar. Por exemplu, favorecer que les persones tengan tiempu y accesu a recursos d'ociu y cultura, a parques y a espacios verdes apurre numberosos beneficios. Asina, peor cada euru invertíu nestes actuaciones pueden recuperase hasta 23 pol aumentu de la calidá de vida y el menor usu de los servicios asistenciales.

Per otra parte, consiguir que solo una persona más vaya caminando a la escuela supondría un aforru próximo a los 850 euros, en términos de meyora de la salú, aforru para'l sistema sanitariu y amenorgamientu de la contaminación venceyada al tráficu.



Asturies actúa en salú

Nel ámbitu de l'acción comunitaria, producióse una medra significativa del trabayu nel territoriu, de la que s'avanzó na sistematización del métodu y nel afitamientu d'estructures de participación. Esi métodu resúmese en trés pasos: collaboración colos conceyos para ameyorar la salú, definición de les riqueces y necesidaes de cada conceyu y establecimientu d'un plan d'acción.

La implicación política, técnica y ciudadana a nivel local foi fundamental pa fortalecer los espacios d'acción comunitaria. En concreto, nel periodu 2017-2018 llévensa a cabu 280 visites a meses intersectoriales y conseyos de salú en 27 conceyos nes que participaron 1.877 profesionales sanitarios y d'otros ámbitos.

Respecto al proyectu Asturias actúa en salú, empobináu a ameyorar la identificación d'activos saludables, la base de datos del observatoriu inclúi anguaño 2.063 actividaes y recursos.

En cuanto al trabayu realizáu nel ámbitu de l'atención primaria, a finales de 2018, la ferramienta de consulta d'información dende la historia clínica electrónica atopábase disponible en 47 zones básiques de salú de 36 conceyos. Amás, nos postreros dos años realizáronse 84 sesiones formatives con equipos de primaria nes que tomaron parte 856 profesionales del Serviciu de Salú.

Coles mesmes, los estudios epidemiolóxicos sobre conceyos llograron presencia en medios de comunicación y redes sociales, daqué necesario pa impulsar la promoción en salú.



Retos de futuru

De cara a los próximos años, el Plan de Salú va reforzar l'acción comuñal nos distintos conceyos con una propuesta que sume los esfuerzos que se tán realizando dende l'ámbitu municipal, d'atención primaria y del movimientu ciudadano y asociativo. Tamién se van estender los espacios de participación y va garantizase el sofitu metodolóxicu de Salú Pública pa dinamizar la participación, sofitar los diagnósticos locales ya implementar planes d'acción.

Los proyectos d'acción comunitaria quieren actuar más allá de los estilos de vida y xenerar sistemes resilientes de salú, impulsar la cohesión del texíu social, intervenir sobre contornes saludables y sobre otros determinantes clave como l'empléu o la vivienda.

Amás, pretende caltenese el trabayu collaborativu con entidaes d'ámbitu estatal, al traviés de l'Alianza de Salú Comuñal, ya internacionales, col County Health Rankings & Roadmaps.

La evaluación completa puede consultase nel siguiente enllaz:

https://obsaludasturias.com/obsa/informe-de-evaluacion-del-observatorio-de-salud-en-asturias-2017-2018/

 

   Icono gráfico alusivo al tipo de archivo Audiu (Audiu: 2 Mb) (n'español)

Información sobre el documento

© Copyright 2006. Gobiernu del Principau d'Asturies