Gobiernu del Principau d'Asturies

Asturies, muncho más cerca

Tas en

Asturias.es Temes Tresportes y Movilidá Movilidá El Gobiernu d'Asturies destaca la eficacia de les midíes ...
 

Movilidá

El Gobiernu d'Asturies destaca la eficacia de les midíes adoptaes p’amenorgar los desplazamientos, que cayeron más del 70 % mientres el periodu más duru del confinamientu

Jorge García, director xeneral de Movilidá y Conectividá, sorraya la importancia d'acutar los movimientos pa frenar la espansión de la epidemia. L'amenorgamientu del tresporte públicu per carretera supera'l 80 %: de 157. 213 pasaxeros de media d'un día llaborable normal a 26.672 dende la declaración del estáu d'alarma. L'Executivu del Principáu adelantó'l pagu de dos millones en subvenciones a les empreses de tresporte regular para compensar la perda d'ingresos

17/04/2020

El periodu más duru del confinamientu —cuando se llimitó l'actividá industrial y se paralizó la construcción— llogró amenorgar la movilidá n'Asturies más del 70 %, según los datos que facilitó esta mañana'l director xeneral de Movilidá y Conectividá del Gobiernu del Principáu, Jorge García. La restricción de los desplazamientos y el distanciamientu social son “la meyor de les vacunes frente al coronavirus”, sorrayó.

La declaración del estáu d'alarma obligó al Gobiernu d'Asturies a “dar un xiru de 180 graos a les polítiques d'impulsu de la movilidá pa convertiles nuna ferramienta efectiva nel control de la pandemia”, afirmó García. Agora, el primer oxetivu ye llimitar los desplazamientos al mínimu posible.

El director xeneral destacó que ye positiva la fuerte cayida de la movilidá mientres la parada económica. Si se tienen en cuenta los datos del tresporte públicu, del vehículu priváu y inclusive los piatonales, l'amenorgamientu asitió percima del 70 %. Esta baxada céntrase, principalmente, nos desplazamientos que se realicen nun radiu de 10 a 50 quilómetros dende la casa.

Dalgunos de los datos espuestos por Jorge García fueron estos:

  • Tresporte públicu per carretera. Pasó d'una media de 157.213 pasaxeros d'una xornada llaborable normal a 26.672 mientres l'estáu d'alarma y 24.321 mientres el períodu más restrictivu. L'amenorgamientu asitió nel 83,1 % y 84,6 %, respectivamente.
  • Consorciu de Tresportes. Los desplazamientos nos servicios interurbanos dependientes del Consorciu de Tresporte baxaron d'una media de 48.000 usuarios a 4.700 col estáu d'alarma. Esa cantidá cayó hasta los 2.300 mientres la fase más dura. Los descensos respectivos son del 90,20 %, y del 95%. Concluyíos los 15 díes de confinamientu escepcional, el tresporte interurbanu recuperóse llixeramente, hasta los 2.900 usuarios.
  • Hospital Universitariu Central d'Asturies (HUCA). L’HUCA ye unu de los puntos que xenera más movilidá na comunidá autónoma. Mientres estos díes, la llegada de pasaxeros en tresporte interurbanu menguó un 51 %, con una media de 400 usuarios diarios, “un amenorgamientu importante pero muncho menor que’l del restu de la rede”.
  • Ruta Uviéu-Xixón. Tamién dientro de los datos correspondientes al Consorciu de Tresportes, la ruta Uviéu-Xixón pasó de mover 10.037 pasaxeros de media a tan solo 588 mientres l'estáu d'alarma y 308 mientres la fase restrictiva de l’actividá económica. Les cayíes xuben al 94 % y 97 %, respectivamente.
  • Desplazamientos interprovinciales. L'amenorgamientu de la movilidá ye especialmente vultable nos trayectos interprovinciales, tanto los que se realicen per carretera como por avión o ferrocarril, con un descensu mediu superior al 80 % dende'l confinamientu, y que superó'l 96 % nel periodu más estrictu. Nos desplazamientos interprovinciales producióse un drásticu amenorgamientu de la ufierta del tresporte públicu: d'una media de 14.400 places diaries a menos de 200, lo que supón una ufierta un 98,6 % inferior a la d'un día ordinariu. “El zarru del tresporte públicu interprovincial ye prácticamente un fechu y los desplazamientos concéntrense nel usu del vehículu priváu”, concluyó Jorge García.
  • Autopista del Güerna. Otru de los indicadores del descensu de la movilidá son los vehículos qu'utilicen l'autopista de la Ruta de la Plata (AP-66), qu'incluye l'autopista d'Asturies a Llión. Frente los más de 6.000 movimientos d'entrada y de salida que pueden algamase un día ordinariu, anguaño la media ye de 1.500, un amenorgamientu del 75 %.

García sorrayó la contribución del sector del tresporte a abastecer los mercaos, supermercaos y servicios sanitarios. “Sumó pa caltener l'actividá de trabayos esenciales anque'l zarru de los establecimientos de restauración complicó'l so llabor”. Cola mira de facilitar el trabayu de los tresportistes, n'Asturies decretóse la posibilidá d'utilizar 26 establecimientos d'hostelería y restauración. Per otra parte, establecióse que 85 estaciones de serviciu n'Asturies permanezan col so horariu d'atención habitual y 22 puedan tener criterios de flexibilidá horaria, pa garantizar el suministru a estos trabayadores.

En materia económica, la Conseyería d'Infraestructures aprobó'l pagu antemanáu de dos millones (nes subvenciones denominaes de débil tráficu), a les empreses concesionaries de servicios de tresporte regular cola mira de desaniciar la falta d'ingresos. Nel casu de les empreses que se dediquen al tresporte escolar, decidió l'abonu a cuenta del 50 % del preciu de los servicios non emprestaos.

El titular de la Dirección de Movilidá convidó a sacar conclusiones d'esti períodu. “Tenemos que facer una reflexón pa favorecer conductes nueves que modifiquen la nuestra forma de movenos. Tenemos de ser capaces, y nello tamos trabayando, d'aplicar midíes pa la movilidá de la mañana, aprovechando l'obligáu reiniciu al que vamos ver sometíos”, sorrayó. “Ye menester dar prioridá al tresporte a pie o con medios non contaminantes, de la mesma qu'hemos impulsar el tresporte públicu percima del priváu”, añedió.

Información sobre el documento

© Copyright 2006. Gobiernu del Principau d'Asturies