Gobiernu del Principau d'Asturies

Asturies, muncho más cerca

Tas en

Asturias.es El Principáu, el Conceyu de Xixón y la Delegación del Gobiernu ...
 

Aniciu

El Principáu, el Conceyu de Xixón y la Delegación del Gobiernu conderguen l'asesinatu por violencia de xéneru de María Paz Fernández Borrego

Les trés instituciones convoquen una concentración de repulsa énte’l Consistoriu xixonés, mañana, a las 12 hores

12/03/2018

El Gobiernu del Principáu, el Conceyu de Xixón y la Delegación del Gobiernu n'Asturies manifiesten el so más enérxica condena y la so fonda consternación pol asesinatu por violencia de xéneru de María Paz Fernández Borrego, vecina de Xixón. Trátase del primer asesinatu d'estes característiques que se rexistra na comunidá dende 2016.

Los últimos datos publicaos pol Ministeriu de Sanidá, Servicios Sociales ya Igualdá reflexen qu'en 2017 fueron asesinaes n'España 49 muyeres. Coles mesmes, hasta'l 13 de febreru d'anguaño perpetáronse otros trés crímenes machistes. Tampoco pueden escaecese los ocho menores asesinaos polos sos proxenitores o les pareyes de les sos madres el pasáu exerciciu.

Les trés instituciones, según el Conseyu Asturianu de la Muyer y el Conseyu d'Asociaciones de Muyeres de Xixón, quieren treslladar les sos *condolencias a la familia de María #Paz Fernández y ponen a la so disposición tolos servicios d'asesoramientu xurídicu y sofitu previstos para estos casos.

Amás, tresmiten a la ciudadanía la necesidá d'algamar un compromisu colectivu que condergue de manera atayante la violencia de xéneru, porque implica un grave déficit de llibertá y seguridá para les muyeres, al empar que torga llograr una sociedá igualitaria y xusta. Les trés alministraciones creen que la tolerancia cero ye la única respuesta posible énte les agresiones machistes y les sos tarrecibles consecuencies.

Tamién manifiesten la so voluntá de siguir impulsando midíes y reforzando los mecanismos de coordinación nel marcu del Pactu Social contra la Violencia sobro les Muyeres del Principáu d'Asturies.

Per otra parte, encamienten a les muyeres que güei sufren violencia de xéneru, según a los sos familiares y amistaes, que se dirixan a les alministraciones públiques o a les organizaciones especializaes pa solicitar información y planiar la meyor forma de romper la relación. Nesti sentíu, recuerden qu'existe una rede de servicios destinaos a les víctimes que garantiza'l so derechu a la información, a l'asistencia, a la protección y la recuperación integral, como son los centros asesores, el serviciu telefónicu d'información 016 y, énte posibles emerxencies, el 112.

L'Executivu autonómicu, el Conceyu de Xixón y la Delegación del Gobiernu n'Asturies convocaron xuna concentración de repulsa énte'l Consistoriu xixonés pa mañana, martes, a les doce del mediudía. Les trés instituciones conviden a participar a tola ciudadanía pa espresar el refugu unánime de la sociedá a la violencia contra les muyeres.

 

 

Información sobre el documento

© Copyright 2006. Gobiernu del Principau d'Asturies