Gobiernu del Principau d'Asturies

Asturies, muncho más cerca

Tas en

Asturias.es Mocedá La mocedá asturiano tien una mayor percepción de los riesgos del ...
 

Mocedá

La mocedá asturiano tien una mayor percepción de los riesgos del consumu d’alcohol y tabacu

El vezu de fumar a diario caltiénse en mínimos históricos, pero triplícase l’usu esperimental de los cigarros electrónicos. El Plan de Salú del Principáu 2019/2030 propón actividaes que favorezan vezos saludables y reduzan l’usu de droga, tanto llegal como illegal

d'esquierda a derecha, el xefe de Serviciu de Salú Poblacional, Ramón Hevia; el director xeneral de Salú Pública, Rafael Cofiño, y el responsable del Observatoriu sobre Droga, Antón González

20/01/2020

La percepción del riesgu de consumir droga asociao al alcohol y tabacu aumentó ente la mocedá escolar asturiano con edaes ente 14 y 18 años. Asina lo reflexen los resultaos de la última Encuesta sobro l’Usu de Droga n’Enseñances Secundaries n’España (Estudes).

Nel casu del alcohol vese una mengua caltenida dende’l 2012, sobre manera nos consumos de más riesgu. Por sexos, el consumu nos postreros 30 díes ta nel 54 % por parte de los mozos y el 57 % de les moces, frente al 78 % y 83 % de va siete años. Esti mesmu enclín decreciente siguen los atracones o inxestes masives, que pasaron del 45 % nel 2012 al 30 % na actualidá.

La encuesta constata que l’alcohol ye la droga d’iniciu al consumu más tempranu, con una edá media asitiada nos 14 años. Síguen-y les hipnosedantes y el tabacu.

El vezu del consumu de tabacu a diario caltiénse en mínimos históricos, con una media del 8,5 %. Por sexos, el consumu mediu en mozos ye de 9 % y el de les moces, el 8 %. Pola contra, triplicóse’l consumu esperimental de los cigarros electrónicos. Del 12 % que se rexistraba nel 2016-2017, pasóse al 39 %. Amás, la percepción del riesgu asociáu al so consumu ye la más baxa de toles drogues.

Los espertos en Salú Pública alvierten de que toles formes de fumar, incluyíu’l vapéu, creen adicción y son perxudiciales pa la salú. Amás destaquen que los cigarros electrónicos nun son una ferramienta pa dexar el vezu tabáquicu sinón que pue ser una puerta d’entrada al consumu del tabacu.



Hipnosedantes

Otru de los datos que constata la encuesta ye una medría del consumu de los hipnosedantes o benzodiacepines. El 13,4 % de los estudiantes de Segundaria reconocen consumir estos fármacos, con o ensin receta médica, nel últimu añu, y 7,5 % contestaron que los tomaron nel últimu mes. Ye la tasa más alta rexistrada dende’l 2004.

Por sexos, les moces recurren más que los mozos a estes melecines pa tratar l’ansiedá y los trestornos del sueñu. El 8,8 % de les encuestaes reconocieron tomar dalgún hipnosedante nel últimu mes, frente al 6,2 % nos varones.

Los responsables sanitarios avisen de la normalización social del consumu d’estos medicamentos que puen provocar problemes de salú y dependencia.



Drogues illegales

El cannabis ye la droga illegal más consumío ente los mozos de 14 y 18 años. El consumu ye más eleváu ente los varones, anque les diferencies ente sexos amenorgaron na última década.

Ente los que consumieron nel últimu añu constatóse que’l 35 % ye un consumidor de riesgu d’esta sustancia, que produz deterioru de la salú mental. El 18 % refier un riesgu baxu y el 17 %, un riesgu altu. Por sexos, el consumu nos postreros 30 díes asítiase nel 15 % de mozos y el 12 % de les moces.

Tocante a la evolución de la cocaína, el consumu caltiense baxu y ameyoren los datos de la encuesta anterior, al asitiase nel 0,9 % de les moces y el 1,9 % de los mozos nos postreros 30 díes.



Otres adicciones

L’informe tamién analiza’l xuegu tanto online como presencial, qu’esperimenta una medría al respective de los datos de 2016/2017. Nesti sentíu, el 12,8 % de la población d’estudiantes de 18 años considérase nuna situación de xugadores problemáticos qu’afecta más a moces qu’a mozos.

L’usu compulsivu d’internet ye otru de los parámetros estudiaos y nun esperimenta cambeos al respective del añu anterior. La encuesta reflexa que ye más grande ente les moces, un 23 %, en comparanza colos mozos, un 14 %.



Plan de Salú del Principáu d’Asturies 2019/2030

El Plan de Salú del Principáu d’Asturies 2019/2030, coordináu dende la Dirección Xeneral de Salú Pública, propón actividaes p’ameyorar contornes y condiciones de vida que favorezan que les persones puedan optar a conductes más saludables. De forma específica’l tabacu, l’alcohol y los hipnosedantes son una llinia prioritaria d’actuación.

La Encuesta sobre Usu de Droga n’Enseñances Secundaries n’España (Estudes), incluyida nel Plan Estadísticu Nacional, realízase cada dos años. El trabayu de campu del últimu estudiu llevóse alantre ente’l 4 de febreru y el 5 d’abril del 2019 en 51 centros educativos d’Asturies. Participaron 2.039 asturianos ente 14 y 18 años, que cursen 3.u y 4.u de la ESO, 1.u y 2.u de Bachilleratu y ciclos de Formación Profesional Básica y de Grau Mediu.

   Icono gráfico alusivo al tipo de archivo Audiu 1 (Audiu: 556 Kb) (n'español)
   Icono gráfico alusivo al tipo de archivo Audiu 2 (Audiu: 475 Kb) (n'español)
   Icono gráfico alusivo al tipo de archivo Audiu 3 (Audiu: 262 Kb) (n'español)

Información sobre el documento

© Copyright 2006. Gobiernu del Principau d'Asturies