Gobierno del Principado de Asturias

Asturias, mucho más cerca

Estás en

Aniciu El Gobiernu d’Asturies amplía a tola etapa d’Infantil la ...
 

Aniciu

El Gobiernu d’Asturies amplía a tola etapa d’Infantil la cobertura del programa de salú bucodental La conquista de la boca sana

El plan quier que los escolinos de 3 a 12 años garren vezos d’hixene pa prevenir caries y enfermedaes orales. Consta d’una parte teórica que profesoráu y alumnáu trabayen nes aules y d’otra práctica con talleres de cepilláu impartíos por enfermeres y hixienistes dentales

d'esquierda a derecha: Paloma Alonso, técnica de la Conseyería d'Educación; Antonio Molejón, director xeneral de Salú Pública; Francisco Laviana, director xeneral d'Ordenación Académica y Innovación Educativa, y José María Blanco, dentista de la Conseyería de Sanidá

12/06/2019

El Gobiernu d’Asturies actualizó los conteníos y materiales del programa de salú bucodental La conquista de la boca sana y amplió la so cobertura pa beneficiar a tol alumnáu d’Educación Infantil y Primaria; esto ye, de 3 a 12 años, cuando hasta agora empezaba a los 5.

Esta actuación, implantada va diez años, ye un plan de sofitu a l’acción educativa que, nel marcu de la Estratexa d’atención a la salú oral, llogra meyores significatives na infancia y nos primeros años de l’adolescencia.

Los directores xenerales de Salú Pública, Antonio Molejón, y d’Ordenación Académica y Innovación Educativa, Francisco Laviana, presentaron güei’l proyectu anováu, que busca ameyorar los vezos d’hixene oral del alumnáu y ufiertar les conocencies fundamentales pal cuidáu de la boca na población d’hasta 12 años.

La conquista de la boca sana consta d’una parte teórica que profesoráu y alumnáu trabayen n’aula y incluye información sobre l’anatomía y fisioloxía de la boca, la patoloxía oral y la prevención d’enfermedaes en distintos materiales didácticos.

La parte práctica contempla talleres de cepilláu nes aules impartíos por hixenistes y profesionales d’enfermería pediátrica. Realízase con cepiyos de dientes pa cada neñu y tipodontos (boques xigantes) y cepiyos xigantes suministraos a los centros pola Conseyería de Sanidá, que tamién apurre cartelos, diplomes y calendarios.

Na renovación del programa participaron profesionales del Centru de Profesoráu y Recursos d’Avilés-Occidente, maestres d’Educación Infantil y Primaria, y técnicos del Serviciu d’Orientación y Formación del Profesoráu, amás d’Úrsula Maurenzo, hixenista del área sanitaria III (Avilés), y José María Blanco, dentista de la Dirección Xeneral de Salú Pública.

Alredor del 60 % del alumnáu de los centros públicos d’Asturies participa nesti programa, una cifra qu’en delles árees sanitaries supera’l 80 % y n’otres raspia’l cien por cien. La conseyería quier ampliar estes cobertures nos años vinientes, sobre manera nes zones onde se caltienen más baxes: III (Avilés), IV (Uviéu) y V (Xixón).



La salú bucodental n’Asturies

Les 38 unidaes de salú bucodental del Serviciu de Salú del Principáu (Sespa) atienden cada añu 145.000 consultes. La implantación de la Estratexa d’atención a la salú oral fai más de dos décades supunxo una meyora real. Asina, anguaño, el 42 % de los escolinos presenta dalguna caries a los 12 años, una cifra sensiblemente menor al 74 % d’entós.

Ún de los indicadores que tamién evolucionó ye’l CAO, qu’evalúa la media de dientes cariaos, ausentes por caries y obturaos na población esplorao. En 1992, amosaba nel Principáu una tasa de 3,33 n’escolinos de 12 años, mentes que na última evaluación baxa hasta’l 1,17.

Nes unidaes de salú bucodental, desplegaes en 58 consultes, desenvuelven l’actividá 38 dentistes, 26 hixenistes y 12 técnicos en cuidaos auxiliares d’enfermería, que revisen anualmente a alredor de 4.000 muyeres embaranzaes y 24.000 escolinos.

El programa de salú bucodental ye una iniciativa de calter preventivu, que propón la revisión de los menores en dellos momentos de la edá escolar pa evitar daños nes pieces o amenorgar el so impactu cuando se producieron.

Estes unidaes tamién atienden a persones adultes pa procedimientos agudos y ciruxía menor y impulsen programes de meyora de la salú oral de muyeres embaranzaes y de la población con discapacidá intelectual.

 

   Icono gráfico alusivo al tipo de archivo Audiu (Audiu: 3 Mb) (n'español)
   Icono gráfico alusivo al tipo de archivo Audiu (Audiu: 3 Mb) (n'español)

Información sobre el documento

© Copyright 2006. Gobierno del Principado de Asturias