Gobiernu del Principau d'Asturies

Asturies, muncho más cerca

Tas en

Asturias.es Temes Tresportes y Movilidá El Principáu empecipia'l periodu de pruebes del plan pilotu de ...
 

Tresportes y Movilidá

El Principáu empecipia'l periodu de pruebes del plan pilotu de tresporte públicu con reserva de plaza mensual

L'ensayu empezó n'una llinia ente Uviéu y Xixón destinada a emplegaos públicos. Una aplicación creada pol CTA permite guardar asientu d'ida y vuelta col billete únicu

23/06/2020

El Gobiernu d'Asturies empecipió'l periodu de pruebes del plan pilotu de reserva de places con billete únicu nel tresporte públicu interurbanu per carretera, que va poner en marcha nos meses de xunetu y agostu p’aguiyar l'enfotu de la ciudadanía y ameyorar el serviciu nos principales desplazamientos.

Esti ensayu, que s'empecipió colos trabayadores de l'Alministración autonómica, pretende favorecer una entrada y salida al trabayu en veces gradiaes tres el periodu braniegu. Consiste n'una aplicación de reserva de plaza desenvuelta pol Consorciu de Tresportes d'Asturies (CTA) que va facer posible acutar trayectu d'ida y vuelta, hora y plaza nes rutes más frecuentaes, ensin costu adicional. D'esta miente, quierse ameyorar los tiempos, al ufiertar viaxes directos ente distintes paraes cuando la demanda asina lo aconseye.

Dende ayeri, el CTA ufierta a los emplegaos públicos la posibilidá d'utilizar esta ferramienta nun serviciu ente Uviéu y Xixón, nel principal horariu d'entrada y salida del trabayu, con un percorríu bien ampliu en dambes ciudaes. La reserva garantiza l'asientu nesi serviciu col abonu mensual billete únicu, que tien de disponer de carga a valir nel momentu de realizar la operación.

Primeramente, el proyectu va implantase ente colectivos de funcionarios y sanitarios. Nuna segunda fase, prevista a partir de setiembre, va abrise a tolos usuarios pa desplazamientos al trabayu y a la Universidá. L'aplicación va permitir realizar una distribución óptima de la flota d'autobuses, mesmo que crear percorríos amenorgaos y más directos.

El CTA tamién prevé implantar l'aplicación, nel futuru, nel tresporte públicu de los polígonos industrial y tecnolóxicu del área central, con servicios directos a les principales ciudaes, siempre qu'exista un númberu mínimu d'usuarios. La midida busca retomar el conceptu de tresporte d'empresa, entamáu pol consorciu y cola opción d'atender a trabayadores de delles factoríes allugaes nuna mesma zona. Les tarifes van ser les regulares del billete únicu y, amás, cada empresa podría bonificar a los sos emplegaos total o parcialmente.

Información sobre el documento

© Copyright 2006. Gobiernu del Principau d'Asturies