Gobiernu del Principau d'Asturies

Asturies, muncho más cerca

Tas en

Asturias.es Temes Educación La Conseyería d'Educación peracaba la repartida d'equipos y ...
 

Educación

La Conseyería d'Educación peracaba la repartida d'equipos y conexones al alumnáu afectáu pola fienda dixital

El Principáu va dar prioridá a estudiantes de Bachilleratu, FP, 4º de la ESO y 6º de Primaria. Carmen Suárez asegura que'l procesu d'enseñanza-aprendizaxe va evaluase porque'l criteriu d'un aprobáu xeneral va contra la normativa vixente

06/04/2020

La conseyera d'Educación, Carmen Suárez, afirmó güei que, énte la suspensión de l'actividá docente presencial, el so departamentu peracaba'l plan pa salvar la fienda dixital qu'afecta aproximao a 6.000 families con fíos y fíes que cursen estudios non universitarios -3.000 d'elles na zona rural-, a les que se va tratar de facilitar conexones a internet y equipos que permitan l'accesu a la rede. Pa ello, va dase prioridá al alumnáu de Bachilleratu, Formación Profesional (FP), y estudiantes que rematen etapes: 6º de Primaria y 4º d'ESO.

“La tecnoloxía vieno pa quedase y nun podemos dexar a nenguna familia al marxe, lo cual oblíganos a analizar y decidir ónde invertir”, sorrayó. Suárez indicó qu'ellí onde nun seya posible llegar va trabayar en collaboración colos servicios sociales municipales.

Amás, col propósitu de reforzar y democratizar l'aprendizaxe competencial (más basáu nes competencies que nes materies puramente diches), la conseyería impulsó la emisión del programa mañaneru Educastur TV, con conteníos pa distintos niveles y materies que puede siguise de llunes a vienres na Televisión del Principáu d'Asturies (TPA).

La responsable d'Educación informó güei per videoconferencia d'estos y otros asuntos al grupu de trabayu constituyíu na Xunta Xeneral pal siguimientu y evaluación del coronavirus n'Asturies. Mientres la so intervención, refirióse a cuestiones como la fienda dixital, qu'imposibilita l'accesu a los conteníos en llinia; les oposiciones docentes aplazaes a 2021, les ayudes de comedor y les evaluaciones, con especial atención a la EBAU, que les comunidaes y les universidaes alcordaron celebrar antes del próximu 10 de setiembre.

Al respective de la promoción del alumnáu, señaló que la evaluación ye inescusable, al dir contra la normativa vixente el criteriu d'un aprobáu xeneral. Asina, nel tercer trimestre, la comunidá educativa va trabayar fundamentalmente aspectos rellacionaos coles competencies clave, ensin qu'esto suponga avanzar materia, daqué que solo va poder realizase en 2º de Bachilleratu, siempre que nun implique esclusión o discriminación y, en nengún casu, en perxuiciu del alumnáu.

La conseyera refirióse a otros temes d'interés, como la continuación de l'actividá lectiva, que la so fecha depende de les autoridaes sanitaries, y la escolarización del alumnáu pal próximu cursu, que se va realizar tamién de forma telemática.

A lo último, estimó'l trabayu del profesoráu y les reflexones y propuestes de toles persones y entidaes arreyaes nel sistema (organizaciones sindicales, direcciones de centros y asociaciones de madres y padres, ente otres), coles que l'Alministración ta en continua comunicación.

Información sobre el documento

© Copyright 2006. Gobiernu del Principau d'Asturies