Gobiernu del Principau d'Asturies

Asturies, muncho más cerca

Tas en

Asturias.es Temes Cultura Patrimoniu Históricu y Cultural Cultura pide a los responsables del Pentágonu del Arte ...
 

Patrimoniu Históricu y Cultural

Cultura pide a los responsables del Pentágonu del Arte qu’intensifiquen l’apuesta polos creadores asturianos nes sos programaciones

Berta Piñán analiza coles direcciones de los equipamientos l'impactu de la crisis y la importancia del mundu dixital pal sector mientres el confinamientu . La conseyera propón crear una oficina d'asesoramientu pa favorecer l'accesu de los artistes a les llinies de financiación y producción nacionales y europees

14/04/2020

La conseyera de Cultura, Política Llingüística y Turismu, Berta Piñán, señaló güei la necesidá d'intensificar l'apueste polos artistes asturianos en retomándose les actividaes de los equipamientos culturales del Principáu. Tamién encamentó a dar prioridá a la so participación nes nueves programaciones, en pasando l'estáu d'alarma.

Piñán presidió una xunta telemática del Pentágonu del Arte, nel que s'integren, amás de la conseyera, los responsables del Muséu de Belles Artes, la sala Borrón d'Uviéu, Llaboral Centru d'Arte y Creación Industrial, el Centru Niemeyer y el Muséu Barjola de Xixón. Nel alcuentru participaron tamién los directores xenerales de Cultura y Patrimoniu, Pablo León, y de Mocedá, Clara Sierra.

Na la xunta, analizóse l'impactu de la crisis sanitaria sobre la cultura asturiana y los equipamientos venceyaos a la promoción artística. Los responsables d'estos centros espunxeron cómo se ta reorientando la so actividá escontra les redes sociales ya internet, de la que realicen trabayos d'organización interna y de reflexón sobre'l so futuru llabor tres la cuarentena.

La conseyera de Cultura señaló que “el mundu de la cultura demostró, una vegada más, que ye esencial y necesariu pa la nuesa sociedá”. “El so llabor, altruista y arrogante nesta crisis foi y va ser fundamental pa caltener la salú física y mental de la ciudadanía nel confinamientu”, añedió.

Piñán afirmó que se debe “reconocer el papel de la cultura ensin escaecer que ye un sector económicu, una industria de la que dependen munches persones”. Nesi sentíu, apeló “a la necesidá de cavilgar sobre’l papel del mundu dixital nesta situación y sobre el llabor desenvueltu poles y los artistes al traviés d'estos medios”. Al so xuiciu, esto tien de llevar tamién a analizar sistemes polos que los artistes puedan percibir una contraprestación económica en cuenta de l'espardimientu de la so obra en diches plataformes.



Oficina d'asesoramientu

Na xunta, valoróse la oportunidá de crear una oficina d'asesoramientu con vistes a favorecer l'accesu de losl ceadores asturianos a llínies de financiación y producción autonómiques, nacionales y europees qu'ameyoren la so situación y proyección esterior. Esti órganu va cuntar col sofitu global del Pentágonu del Arte. “El Pentágonu tenía sentíu nel pasáu, pero agora puede y tien d'adquirir una dimensión muncho más importante nel sofitu a la cultura asturiana”, indicó. Coles mesmes, citó la creación de la oficina d'asesoramientu como un exemplu de lo que se pue facer.

Piñán agradeció a les persones responsables de los equipamientos que conformen el Pentágonu del Arte'l llabor que tán desenvolviendo nesta crisis, y manifestó la so voluntá de caltener en 2020 premios como'l Barjola, “dende'l convencimientu del importante papel que galardones como ésti tienen nel sofitu a la producción nel ámbitu artísticu y cultural”.

A lo último, alcordóse que les xornaes que'l Pentágonu del Arte entama dende va cuatro años so la denominación Parte del Arte se realicen na edición de 2020 de manera dixital. En concreto, van dedicase al alderique sobre los retos y desafíos que se-y plantegen a la cultura nel nuevu escenariu xeneráu pola crisis del COVID-19.

Información sobre el documento

© Copyright 2006. Gobiernu del Principau d'Asturies