Gobiernu del Principau d'Asturies

Asturies, muncho más cerca

Tas en

Asturias.es Muyeres Salú recuerda que'l sistema sanitariu ye fundamental para ...
 

Muyeres

Salú recuerda que'l sistema sanitariu ye fundamental para detectar situaciones de violencia de xéneru mientres el confinamientu

Los centros Asesores de la Muyer van atender los casos urxentes a lo llargo del estáu d'alarma pola pandemia del coronavirus. Tamién existe un serviciu de Whatsapp de sofitu emocional al traviés de los númberos de teléfonu 682916136 y 682508507

29/03/2020

La Conseyería de Salú, siguiendo los encamientos de la Dirección Xeneral d'Igualdá, recuerda la importancia que tien el sistema sanitariu para detectar situaciones de violencia de xéneru, yá que en munchos casos esti ye l'únicu contactu que van tener les muyeres cola so redolada esterior.

Por ello, encamienta a los profesionales sanitarios a caltenese vixilantes pa descubrir estes situaciones, por cuenta de que xueguen un papel relevante na detección y atención de la violencia. Una ventaya que s'aprecia entá más nel actual estáu de confinamientu qu'obliga a la convivencia familiar y aumenta el riesgu a sufrir agresiones nel casu de les muyeres víctimes d'agresiones machistes al vese obligaes a compartir l'espaciu del llar colos sos agresores.

La información específica ta disponible al traviés de la páxina de www.astursalud.es y los encamientos unviáronse al personal sanitariu.

Les muyeres que sufren esti tipu de violencia pueden solicitar ayuda, de manera presencial o per teléfonu, nos centros de salú y los servicios d'urxencies. Amás, los centros Asesores de la Muyer (CAM) van atender los casos urxentes na situación escepcional provocada pola pandemia del coronavirus.

El teléfonu d'ayuda a les víctimes sigue funcionando con normalidá les 24 hores del día tolos díes de la selmana. Los númberos nos que puede pidise información son el 012 ó 016 (al traviés de email 016online@mscbs). Tamién se cunta cola aplicación Asistencia Inmediata Fuerces y Cuerpos de Seguridá del Estáu alertcops. ses. mir.es/mialertcops y con un serviciu de Whatsapp de sofitu emocional al que puede contactase escribiendo a los númberos de teléfonu 682916136 y 682508507.

Para más información, puede consultase el Protocolu Sanitariu Para Ameyorar l'Atención a les Muyeres que sufren Violencia de Xéneru nel siguiente enllaz https://bit.ly/39pN12q y el portal Astursalud https://bit.ly/2wFqQI0

Información sobre el documento

© Copyright 2006. Gobiernu del Principau d'Asturies