Gobiernu del Principau d'Asturies

Asturies, muncho más cerca

Tas en

Asturias.es Infancia y Families Dos de cada tres miembros de los grupos de participación de les ...
 

Infancia y Families

Dos de cada tres miembros de los grupos de participación de les Ciudaes Amigues de la Infancia n’Asturies son críes

Trenta y cinco conceyos disponen d'esti sellu de calidá de Unicef y otros trece tán tramitando'l so llogru. 1. 500 menores de 6 a 17 años fáense corresponsables del desenvolvimientu de les sos comunidaes al traviés d'estos foros. El Principáu destaca l'altu nivel d'implicación y compromisu de la mocedá asturiana

04/03/2020

Dos de cada trés miembros de los grupos de participación infantil y adolescente de les Ciudaes Amigues de la Infancia n'Asturies son críes. Anguaño, 35 conceyos cunten con esti sellu de calidá que concede Unicef pa premiar a aquellos conceyos que desenvuelven polítiques d'infancia y fomenten la participación de menores, y otros trece tán tramitando'l so llogru.

Tantu los conceyos que yá lo recibieron como los qu'opten a él tienen de crear y caltener un grupu de participación infantil y adolescente. Al traviés d'estos foros, los sos miembros tienen derechu a ser escuchaos polos responsables municipales nos asuntos que-yos concernen y a que les sos opiniones y propuestes se tomen en considerancia. D'esta forma, fáense corresponsables, na midida de les sos posibilidaes, del desenvolvimientu de les comunidaes nes que viven, convirtiendo asina los procesos de participación n'una escuela de ciudadanía.

Estos grupos axunten a 1.500 menores de 6 a 17 años, que participen de forma regular nes actividaes programaes. “Los datos ufiértennos resultaos bien positivos; per un sitiu, que nel Principáu se tenga en cuenta la voz de los menores, mesmo que les sos necesidaes y les sos reivindicaciones y, per otru, l'altu nivel d'implicación y compromisu de les nueves”, aseguró'l director del Institutu Asturianu para l'Atención Integral a la Infancia y a les Families, Carlos Becedóniz.

El 85% de los menores del Principáu moren en poblaciones que fueron reconocíes por Unicef con esti sellu, un porcentaxe que representa la media más alta a nivel nacional. Asturies foi pionera al xuntase a esta iniciativa cuando va quince años se convirtió na primer comunidá en promover el programa Ciudaes Amigues de la Infancia. Amás, caltiense como l'autonomía que lidera esti movimientu n'España, una y bones el 45% de los sos conceyos disponen d'esta distinción y representen el 12% de los 274 acreditaos en tol país.

Información sobre el documento

© Copyright 2006. Gobiernu del Principau d'Asturies