Gobiernu del Principau d'Asturies

Asturies, muncho más cerca

Tas en

Asturias.es Persones entamadores El Principáu pon en marcha un programa de práctiques pa mocedá ...
 

Persones entamadores

El Principáu pon en marcha un programa de práctiques pa mocedá n’empreses asturianes con sede n’esterior

El conseyeru Isaac Pola recibió güei a los siete becarios que van desenvolver la beca en firmes de la rexón implantaes en México, Alemaña y Chile a lo llargo d’ocho meses

El consejero de Empleo, Industria y Turismo, Isaac Pola; el rector de la Universidad de Oviedo, Santiago García Granda, y las directoras de Asturex y de la FUO, Teresa Vigón y Cecilia Bethencourt, junto con los becarios

16/10/2018

El conseyeru d’Empléu, Industria y Turismu, Isaac Pola, presentó güei’l programa de práctiques n’empreses asturianes con sede n’esterior que punxo en marcha la Sociedá de Promoción Esterior del Principáu (Asturex) en collaboración cola Fundación Universidá d’Uviéu (FUO, nes sos sigles en castellanu).

Esta convocatoria pionera, empezada esti mes d’agostu y qu’incluyó delles pruebes de selección tanto d’empreses como de becarios, va dexar que siete mozos desenvuelvan práctiques en México (5 beques), Alemaña (1 beca) y Chile (1 beca). El periodu formativu va allargase 8 meses: dende’l 1 de payares hasta’l 28 de xunu del 2019, en sedes estranxeres d’empreses asturianes con fuerte componente internacional.

El titular d’Empléu recibió esta mañana a los mozos, nun alcuentru al que tamién asistieron el rector de la Universidá d’Uviéu, Santiago García, y los directores d’Asturex y de la FUO, Teresa Vigón y Cecilia Bethencourt, respectivamente.

Con esta iniciativa, Asturex sofita les firmes rexonales na so proyección internacional y pon a la so disposición un grupu escoyíu de mozos altamente cualificaos. Amás, los becarios escoyíos van tener la oportunidá d’adquirir formación práctica nel so ámbitu d’especialización.

Nes práctiques, los mozos van desenvolver el plan de formación en materia de comerciu internacional presentáu poles empreses y validáu por Asturex. Amás, van efectuar les xeres encomendaes pola Sociedá de Promoción Esterior, ente les que destaquen estudios y notes de mercáu y la preparación de respuestes a consultes de compañíes asturianes y del país de destín. P’acabar, amás de preparar documentación sobre’l mercáu estranxeru correspondiente y la so área d’influencia, los becarios van collaborar n’acciones de promoción y van dar sofitu a les misiones comerciales entamaes por Asturex.

La Sociedá de Promoción Esterior apurre’l cien por cien de la dotación del becariu, al que se-y va realizar un siguimientu de contino sobre’l trabayu desenvueltu na sede estranxera, tanto pa la empresa como p’Asturex, a lo llargo de los ocho meses.

Esta iniciativa supón una ferramienta más de sofitu a la internacionalización de les empreses asturianes y ayuda a la medría de la economía rexonal.

Les empreses beneficiaries de la convocatoria son estes:

País Sector Razón social Páxina web
Chile Metal Industrias Metálicas Imetal S.A.. http://www.imetalsa.es 
México TIC Futuver Consulting S.L. http://www.futuver.com
México Jurídico Ontier http://www.ontier.es
México TIC Izertis S.L. http://www.izertis.com
México TIC Mobentis Multisoft, S.L http://www.mobentis.com
México Metal Hidritec Water Systems S.L. http://www.hidritec.com
Alemaña Metal Samoa Industrial, S.A. http://www.samoaindustrial.com

 

   Icono gráfico alusivo al tipo de archivo Audiu (Audiu: 985 Kb) (n'español)

Información sobre el documento

© Copyright 2006. Gobiernu del Principau d'Asturies