Gobiernu del Principau d'Asturies

Asturies, muncho más cerca

Tas en

Asturias.es Temes Cultura Retayos d'Asturies Manuel García Menéndez gana’l Premiu Xosefa Xovellanos de Novela ...
 

Retayos d'Asturies

Manuel García Menéndez gana’l Premiu Xosefa Xovellanos de Novela n’asturianu

28/11/2018

Manuel García Menéndez (Uviéu, 1962) resultó ganador de la 39 edición del Premiu Xosefa Xovellanos de Novela en llingua asturiana, que concede la Conseyería d’Educación y Cultura.

El xuráu encargáu de valorar les obres presentaes reunióse na mañana de güei, baxo la presidencia del director xeneral de Planificación Llingüística y Normalización, Fernando Padilla, y tuvo formáu pola escritora Berta Piñán, ganadora de la edición pasada; los escritores Pablo Texón y Pablo Antón Marín Estrada; el profesor de la Facultá de Filosofía y Lletres Leopoldo Sánchez, y la filóloga del Serviciu de Planificación Llingüística y Normalización Lourdes Álvarez.

Ente les obres presentaes, el xuráu decidió conceder, por unanimidá, el premiu a la titulada El visitante impropiu, que se presentó col seudónimu Dana Folgueres, al reconocer nella “una novela ambiciosa con gran oficiu narrativu que representa una propuesta poco habitual na lliteratura asturiana pol so trabayu d’ambientación minuciosu y brillante, amás de tener una trama construyida hábilmente”, según destaca l’acta.

A esti gallardón, dotáu con 3.000 euros, podíen presentase toles persones interesaes con una obra inédita y non premiada n’otros concursos, de tema, xéneru y estructura llibres, escrita en llingua asturiana y con una estensión mínima de setenta y cinco páxines a doble espaciu.

 

Datos del premiáu

Manuel García Menéndez ye llicenciáu n’Historia pola Universidá d’Uviéu y empezó la so trayectoria lliteraria publicando dos cuentos infantiles n’asturianu occidental, dada la so vinculación familiar con Tinéu: Corcuspín el Rozcayeiru (1984) y Delina nel val.le’l Faloupu (1985). Depués de muchos años, publicó n’autoedición la novela La sienda del amigu feliz (2013). Nel 2018 ganó’l XV Concursu de cuentos curtios del Conceyu de Cangas del Narcea na modalidá d’asturianu occidental col rellatu «L’home que caéu nun bardión de lata».

Información sobre el documento

© Copyright 2006. Gobiernu del Principau d'Asturies