Gobiernu del Principau d'Asturies

Asturies, muncho más cerca

Tas en

Asturias.es Temes Cultura Promoción, Cooperación y Difusión Cultural Cultura reabre al públicu les cueves de Tito Bustillo y El ...
 

Promoción, Cooperación y Difusión Cultural

Cultura reabre al públicu les cueves de Tito Bustillo y El Pindal, el castru de Coaña y l'ídolu de Peñatú

Los yacimientos rupestres vuelven a l’actividá con una adaptación de los pases y turnos a les midíes de seguridá riquíes pola crisis sanitaria

10/06/2020

La conseyera de Cultura, Política Llingüística y Turismu, Berta Piñán, visitó esta mañana la cueva d'El Pindal, en Pimiango, por cuenta de la so reapertura al públicu. Dende güei tamién se permiten visites a la cueva de Tito Bustillo, La Cuevona, el castru de Coaña y l'Ídolu de Peñatú

Piñán, que tuvo acompañada pol director xeneral de Cultura y Patrimoniu, Pablo León, y pol alcalde de Ribedeva, Jesús Bordás, recordó que la reapertura de les cueves con arte rupestre produzse una vegada que pudieron rellenase los protocolos que garanticen la seguridá de trabayadores y usuarios.

La conseyera de Cultura valoró la importancia del Documentu Técnicu pa cueves, xacimientos arqueolóxicos y monumentos, publicáu como ferramienta pa salvaguardar la vuelta a l'actividá de los yacimientos rupestres. El trabayu, integráu na web que'l Gobiernu d'Asturies caltien abierta pa informar sobre la crisis (https://coronavirus.asturias.es/desescalada), ye'l más refechu de los preparaos a nivel nacional no referente a yacimientos rupestres.

Les cueves adaptaron los turnos y los pases a les midíes de salvaguarda y protección énte l'actual emerxencia sanitaria. Asina, en Tito Bustillo almítense 5 persones por cada visita y la cueva riosellana va tener cinco pases, dende les 11:00 hasta les 17:00 hores. El Pindal tamién amenorga a grupos de 5 persones les visites y va ufiertar trés pases a partir de les 10:30 hores y cada 90 minutos, aproximao.

L'Ídolu de Peñatú abre de 10:00 a 17:00 hores y va tener pase llibre siguiendo les instrucciones del vixilante. El castru de Cuaña, qu'ufierta serviciu ente les 10:30 y les 17:30 hores, almite un máximu de 20 visitantes, y de 10 persones nes visites empuestes; y la Cuevona, qu'abre a les 10.15 hores, ufierta dos pases fixos a les 11:45 y a les 16:15 hores, con cinco persones máximu.

La cueva d'El Pindal, visitada güei pola conseyera, foi declarada Patrimoniu Mundial en 2008, al igual que Tito Bustillo, La Covaciella, San Román de Candamu y Llonín. Amás, esti añu 2020 fueron declaraos Bien d'Interés Cultural (BIC) la cercana capiya de Santu Medé y los restos del monesteriu de Santa María de Tina, lo que configura nesti ámbitu del estremu oriental d'Asturies un conxuntu patrimonial d'escepcional interés.



El Pindal

La cueva d'El Pindal ye una llarga galería d'ancha boca que s’abre a pocos metros del cantil nun paisaxe d'una gran guapura. Acovez una de les más belles muestres del arte paleolíticu de la rexón, formáu por un grupu de representaciones animalístiques, ente les que destaquen, pola rareza d'esti tipu de manifestaciones na cornisa cantábrica, les figures d'un pexe y de un mamut.

A estos temes xúntense otros de calter simbólicu qu’entá siguen siendo un desafíu les sos interpretaciones: puntuaciones, claviformes, bastoninos, triángulos y un laciforme entepolar na composición. Na execución de la obra d'El Pindal l'home prehistóricu valse de la pintura, predominantemente colorada, y el grabáu. La mayor parte de les imáxenes dispuestes a lo llargo de la paré derecha, y agrúpense en dellos conxuntos estremaos de los que destaca'l Panel Principal, qu'acueye la mayoría de les representaciones.

La figura más famosa de la cueva ye una representación de la contorna d'un mamut. Pintáu n’encarnao y de perfil, técnicamente ta realizada con un trazu seguru y bien proporcionáu, lo que denota un dominiu per parte del artista. Nel centru de la representación apaez una mancha de color coloráu, probablemente restos del color col que tuvo pintáu tol interior de la figura.

Información sobre el documento

© Copyright 2006. Gobiernu del Principau d'Asturies