Gobiernu del Principau d'Asturies

Asturies, muncho más cerca

Tas en

Asturias.es Temes Emplegu El desempléu aumenta n'Asturies en 4.511 persones en marzu pola ...
 

Emplegu

El desempléu aumenta n'Asturies en 4.511 persones en marzu pola cayida de l'actividá derivada de la emerxencia sanitaria

El mes acaba con 77. 451 paraos, un 6,18% más, con xubíes concentraes n’hostelería, comerciu y construcción. El sector primariu, consideráu esencial, ye l’únicu qu’ameyora los sos datos. Pilar Varela, directora del Sepepa, destaca l’esfuerzu del Principáu, que ya aprobó un primer paquete de medíes por más de 32 millones pa paliar los efectos de la crisis

02/04/2020

El desempléu rexistráu xubió en marzu en 4.511 persones (+6,18%) pola menor actividá económica derivada del coronavirus COVID-19 y la finalización de contratos venceyaos al sector servicios y a la construcción. D'esta manera, Asturies cunta anguaño con 77.451 persones inscrites nes oficines de desempléu.

Hasta marzu, Asturies encadenaba 77 meses de descensu interañal consecutivu del paru. Los datos de marzu –n'especial, los correspondientes a les sos últimes dos selmanes, a partir de la declaración del estáu d'alarma- quebraron esti enclín. Sicasí, colos númberos conocíos güei, Asturies foi la sesta comunidá na que menos xubió'l paru en términos intermensuales (de marzu al respective de febreru) y la quinta si la estimación se fai de manera interañal (marzu de 2020 al respective de marzu de 2019).

Según los númberos facilitaos pol Serviciu Públicu d'Empléu del Principáu (Sepepa), l'aumentu del paru correspuende mayoritariamente a persones que remataron el so contratu o vieron rescindida la so relación llaboral de manera anticipada. Les medres porcentuales más elevaes rexístrense fundamentalmente ente los homes (+7,93%), nel grupu d'edá ente 25 y 45 años (+9,22%) y na construcción (+13,06%).

La esceición al aumentu xeneralizáu del paru ye'l sector primariu, esencial pa caltener el suministru d'alimentos. L'actividá d'agricultura, ganadería y pesca ye la única que rexistra un llixeru descensu nel númberu de paraos, 30 persones menos, un -2,11%.

La medra mensual na industria produzse fundamentalmente nes actividaes rellacionaes col metal y arreglos de maquinaria.

Na construcción, el crecimientu del paru rexístrase fundamentalmente nes actividaes de construcción especializada, nos oficios. Nos servicios producénse aumentos importantes nel comerciu al por mayor (con 337 persones más paraes), actividaes rellacionaes cola hostelería (1.079 persones más) y les actividaes venceyaes col empléu (589 persones más), amás d'otros servicios personales (119 persones más).

La incidencia de la crisis sanitaria obsérvase tamién na evolución de la contratación, que baxen hasta los 18.904. En númberos absolutos, son 6.437 menos qu'en (-25,40%).

Otramiente, l'afiliación a la Seguridá Social baxó'l mes pasáu'l 0,96%, per debaxo del promediu estatal, hasta asitiase en 359.525cotizantes, lo que supón 3.499 persones n'alta menos.

Pilar Varela, directora del Sepepa, considera que los datos ponen de manifiestu l'impactu de la crisis sanitaria nel mercáu llaboral. Dende'l 14 de marzu, fecha na que se decretó l'estáu d'alarma, una parte importante de les empreses cesaron temporalmente la so actividá. Destaca, coles mesmes, que l'ampliu conxuntu de midíes económiques y sociales aprobaes pol Gobiernu d'España y complementaes pol Executivu autonómicu van empobinaes a la progresiva recuperación de l'actividá y del empléu, mesmo qu’a dar cobertoria a les persones que más se tán viendo afectaes pola situación escepcional derivada del COVID-19. El Conseyu de Gobiernu aprobó la selmana pasada un primer paquete de diez midíes que va traer un desembolsu superior a los 32 millones.


Icono gráfico alusivo al tipo de archivo Audiu (Audiu: 2 Mb) (n'español)

Información sobre el documento

© Copyright 2006. Gobiernu del Principau d'Asturies