Gobierno del Principado de Asturias

Asturias, mucho más cerca

Estás en

Aniciu Gobiernu Actualidá El rexistru de trabayadores espuestos a axentes canceríxenos ...
 

Actualidá

El rexistru de trabayadores espuestos a axentes canceríxenos identifica 6.639 casos nos sos dos primeros años en vigor

Les 67. 923 comunicaciones recoyíes van dexar identificar a quien tán en contactu con estes sustancies si lleguen a desenvolver dalgún tumor. El conseyeru de Sanidá considera que los cánceres d’orixe llaboral podíen evitase con midíes de prevención poles empreses y los sos servicios de seguranza y salú

D'esqda a dcha: José Manuel Zapico García, secretariu xeneral de CC. OO. d'Asturies; Javier Fernández Lanero, secretariu xeneral d'UXT Asturies; Francisco del Busto, conseyeru de Sanidá; Carlos Paniceres, vicepresidente Federación Asturiana d'Empresarios (Fade) y Valentín Rodríguez, responsable d'epidemioloxía ambiental y llaboral de la D.X. de Salú Pública

21/03/2019

El rexistru de trabayadores espuestos a axentes canceríxenos o mutáxenos del Principáu dexó identificar en dos años 6.639 empleaos en contactu con esta clas de sustancies n’alredor de 180 empreses y vinculaos a más d’una trentena de servicios de prevención de riesgos llaborales.

El Gobiernu d’Asturies punxo en marcha esti rexistru a últimos del 2016 como midida fundamental de prevención primaria frente al cáncer d’orixe llaboral. Dende entós, recoyó 67.923 comunicaciones que van dexar identificar los trabayadores espuestos a esti tipu d’axentes pa, si lleguen a desenvolver dalgún tumor, ayudar al Institutu Nacional de la Seguridá Social y a los mesmos afectaos nel procedimientu de la so reconocencia como enfermedá profesional.

Munches d’estes patoloxíes tienen orixe multifactorial y, dacuando, l’efectu conxuntu d’estes causes pue aumentar la probabilidá de desenvolver un tumor malinu. Por esta razón, evitar la esposición a axentes químicos y físicos nos sitios de trabayu va ayudar a amenorgar la incidencia de cánceres d’orixe llaboral.

El conseyeru de Sanidá, Francisco del Bustu, presentó güei estes cifres na Xornada de prevención del cáncer llaboral. Na so intervención, esplicó qu’estes enfermedaes son evitables con una planificación amañosa de la empresa y de los servicios de prevención encargaos de velar pola seguranza y la salú. “Nel Principáu tenemos bien claro que’l desenvolvimientu económicu nunca pue dir en contra de la salú de les persones y, polo tanto, de la sociedá. Si un proyectu empresarial ye sostenible a costa de provocar mancadures o enfermedaes a los trabayadores, entós ye inviable”, destacó.



Prevención primaria

Nesti sentíu, sorrayó la importancia de la prevención primaria pa consiguir que nun haya axentes canceríxenos nos centros de trabayu y, naquellos casos nos que nun sía posible la so sustitución, pa evitar qu’entren en contactu colos trabayadores. “Esti ye l’elementu central de la prevención del cáncer llaboral y tien que ser una xera primordial del empresariu y del so serviciu de prevención”, amestó.

El cáncer ye la segunda causa de muerte nel mundu y provoca cuasi ún de cada seis fallecimientos. Nel 2015 causó 8,8 millones de fallecimientos y calcúlase qu’alredor d’un 19 % de los cánceres son atribuyibles a factores medioambientales, incluyida la contorna llaboral, polo que les intervenciones ambientales y llaborales son imprescindibles pa menguar la so incidencia. “L’amenorgamientu de la esposición a los carcinóxenos ye rentable dende tolos puntos de vista y ayuda de manera significativa al bienestar xeneral de la población”, aseguró’l conseyeru.



Equipu de valoración de sospecha de cáncer profesional

Amás del rexistru de trabayadores espuestos a axentes canceríxenos, el Principáu cunta con un grupu de trabayu multidisciplinar que da sofitu a los médicos d’atención primaria pa determinar la probabilidá de que l’orixe de determinaos tumores tea rellacionáu con dalguna enfermedá profesional.

L’equipu de valoración de sospecha de cáncer profesional ye un serviciu pioneru nel país n’afondar na rellación ente esta patoloxía y la esposición llaboral. Hasta agora, dexó estudiar a 1.298 trabayadores diagnosticaos de cáncer en situación de baxa llaboral. N’evaluando les histories, topáronse 61 casos con munches probabilidaes de ser clasificaos como enfermedá profesional (5 % del total) y n’otros 96 (8 %) acreitóse una rellación clara, anque menos intensa. Nel 85 % restante (1.103 casos), el cáncer considérase una enfermedá común.

.

 

   Icono gráfico alusivo al tipo de archivo Audiu (Audiu: 373 Kb) (n'español)

Información sobre el documento

© Copyright 2006. Gobierno del Principado de Asturias