Gobiernu del Principau d'Asturies

Asturies, muncho más cerca

Tas en

Asturias.es La conseyera de Desenvolvimientu Rural destaca que la execución ...
 

Aniciu

La conseyera de Desenvolvimientu Rural destaca que la execución de les ayudes Leader xeneró una inversión de 50 millones nel mediu rural “namás en dos años”

El Gobiernu d’Asturies destinó ente’l 2016 y el 2017 un total de 21 millones a 650 proyectos presentaos al traviés de los once grupos d’acción local. María Jesús Álvarez asegura qu’esti programa ye un instrumentu fundamental pa la diversificación económica y la cohesión territorial. La titular del área llamenta que’l refugu de los grupos políticos a los presupuestos menguare en siete millones la convocatoria p’anguaño, que s’asitia en 13 millones

Un momento de la rueda de prensa

11/01/2018

La Conseyería de Desenvolvimientu Rural y Recursos Naturales destinó 21 millones en subvenciones del Programa Leader a 650 proyectos presentaos al traviés de los once grupos d’acción local ente’l 2016 y el 2017, ayudes que xeneraron “una inversión global de 50 millones nel mediu rural asturianu namás en dos años”, informó güei la titular d’esti departamentu, María Jesús Álvarez.

La conseyera realizó, en rueda de prensa, un balance de los dos primeros años d’aplicación del Leader nuevu y destacó que’l sofitu a los proyectos d’entamadores y empresarios supunxo’l 92 % del gastu total (45,5 millones), mentes qu’un 5,4 % destinóse a entidaes locales (2,7 millones) y un 2,4 % (1,2 millones) a organizaciones ensin ánimu d’arriquecimientu.

La responsable de Desenvolvimientu Rural sorrayó que’l grau d’execución d’esti programa, concebíu pa diversificar la economía del mediu rural, ye “el más altu d’España”. “Amás resulta bien positivu y satisfactoriu porque pon de manifiestu la fortaleza del emprendimientu rural, y la capacidá de los grupos d’acción local”, resaltó.

Álvarez punxo amás de manifiestu “la solidez del enfoque políticu del Gobiernu del Principáu, qu’apuesta de forma clara y ensin duldar por una política de desenvolvimientu rural sofitada nun modelu con alta participación social pa la creación d’empléu y actividá económica nos territorios rurales”.

Ente les distintes midíes del programa Leader, la conseyera sorrayó la que tien que ver con proyectos de diversificación económica, tanto dende’l puntu de vista del gastu, 11,8 millones, como pol númberu de proyectos subvencionaos, 269, un 41 % del total. Tamién remarcó la relevancia del llamáu tique rural, que se concedió a 114 proyectos con una aportación pública de 2,3 millones.

Esta midida postrera “ye pionera n’España y creóse pa promover la creación d’empreses non agraries na zona rural, de forma que’l beneficiariu recibe una ayuda personal d’hasta 25.000 euros”, recordó Álvarez. Amás, la titular de Desenvolvimientu Rural refirióse a les ayudes de 2,1 millones pa sofitar la instalación, modernización y ampliación de 52 industries agraries pequeñes.

A xuiciu de la conseyera, el Leader “non solo sigue siendo útil, sinón que ye un instrumentu fundamental pa la diversificación económica y pa la cohesión territorial al mediu rural”.

Asturies foi la primer comunidá autónoma que punxo en marcha esti programa, que la so tercer convocatoria, la del 2018, dotada con 13 millones, ta abierta dende’l 3 de xineru pasáu y hasta’l 15 d’abril.

Álvarez llamentó que los grupos políticos representaos na Xunta Xeneral del Principáu refugaren el proyectu de presupuestos del Principáu porque, ente otres cuestiones, “la convocatoria p’anguaño taría dotada con 7 millones más y algamaría los 20 millones”.

El programa Leader supon el 17,5 % de los 560 millones de gastu previstos dientro del Programa de Desenvolvimientu Rural (PDR) 2014-2020, aprobáu pola Comisión Europea’l 3 d’agostu del 2015. El Principáu ye la segunda comunidá con más inversión porcentual, namás per detrás de Madrid (18 %). La Unión Europea establez la obligatoriedá de destinar a esta iniciativa un mínimu del 5 % del PDR y la media de gastu nel país asítiase nel 9 %.

   Icono gráfico alusivo al tipo de archivo Resumen (Pdf: 259 Kb) (n'español)

Información sobre el documento

© Copyright 2006. Gobiernu del Principau d'Asturies