Gobiernu del Principau d'Asturies

Asturies, muncho más cerca

Tas en

Asturias.es L’andancia de gripe mengua pela cuarta selmana siguida, con 138 ...
 

Aniciu

L’andancia de gripe mengua pela cuarta selmana siguida, con 138 casos por cien mil habitantes

A la Conseyería de Salú paez-y que la fin del gripe estacional va producise a primeros de marzu

20/02/2020

La epidemia del gripe mengua significativamente na séptima selmana del añu y asítiase en 138 casos por cien mil habitantes. La situación sigue siendo d’intensidá baxa depués d’algamar el picu na tercer selmana de xineru y la remisión detéctase en toles edaes.

Según los datos facilitaos pola Rede de Médicos Centinela d’Asturies, los virus gripales predominantes na selmana pasada foron los B, que conviven col A pandémicu. Esta situación ye habitual na fase de descensu de la onda epidémica, polo que la Conseyería de Salú calcula que la final del gripe estacional va producise a primeros de marzu.

L’HUCA, como hospital centinela d’Asturies, rexistró hasta’l 16 de febreru 348 hospitalizaciones, de les que 143 foron graves. Nel conxuntu de la comunidá, los ingresos xubieron a 1.071 y tanto estos como los casos de gravedá presentaben dalgún factor de riesgu y la mayoría nun taben vacunaos.

Los datos nacionales reflexen que la incidencia del gripe baxa en toles autonomíes, sacante en Cataluña, onde la intensidá ye entá media. Estremadura ye la única rexón onde nun hai andancia.



Vacunación y conseyos

Nesta campaña vacunáronse n’Asturies 207.466 persones, 5.655 más que na temporada 2018-19.

La llavadura frecuente de manes con agua y xabón, amás de tener una bona ventilación de los espacios zarraos son les midíes preventives más eficaces pa evitar los contaxos.

En casu de tusir o espirriar tienen que s’usar pañuelos de papel d’un solu usu pa tapar la boca y la nariz, o bien el buecu del coldu pa evitar contaminar les manes. Amás, aconséyase llimpiar con frecuencia les superficies que se toquen como los pomos de les puertes, interruptores etc.

Los síntomes de la enfermedá son malestar xeneral, una fiebre alta súbita y tos, que se trata con antitérmicos. Les autoridaes sanitaries aportunen en que los antibióticos nun curen el gripe.

Información sobre el documento

© Copyright 2006. Gobiernu del Principau d'Asturies