Gobiernu del Principau d'Asturies

Asturies, muncho más cerca

Tas en

Asturias.es La incidencia del gripe baxa per primer vez n'Asturies dende ...
 

Aniciu

La incidencia del gripe baxa per primer vez n'Asturies dende l'entamu de la onda epidémica estacional

Amenorga en tolos grupos d'edá menos nel de les persones mayores de 65 años, nel que sigue aumentando. La proporción de casos graves caltiénse baxa al respective de la temporada anterior y afecta principalmente a varones de más de 75 años

11/01/2018

La incidencia del gripe n'Asturies amenorgóse per primer vegada dende l'entamu de la onda epidémica estacional y asítiase, del 1 al 7 de xineru, n'una tasa de 627,4 casos por 100.000 habitantes. El nivel d'intensidá sigue siendo altu, percima del estragal epidémicu, per octava selmana consecutiva, pero la afectación baxa en tolos grupos d'edá, cola única escepción de les persones mayores de 65 años, ente les que sigue n'aumentu.

Esta situación, xunto cola cayida siguida na tasa d'aislamientos de virus gripales, fai pensar que pue ser l'entamu de la fase de descensu de la onda epidémica, si la so evolución a lo llargo de les próximes selmanes asina lo ratifica. Por cuenta de esto, ye previsible que se produza un amenorgamientu de la demanda asistencial por esta causa, anque inda va ser significativa, una y bones la incidencia entá se caltién alta.

Nel conxuntu d'España, les tases d'incidencia son tamién epidémiques en tola península, con esceición de les Isles Canaries y Ceuta. Dende l'entamu de la temporada publicáronse 912 casos graves hospitalizaos nel conxuntu de les comunidaes autónomes. El 86% de los pacientes con información disponible presentaba factores de riesgu, que, nos adultos, son les enfermedaes cardiovascular y pulmonar cróniques, y la diabetes. El 73% de los afectaos desenvolvió neumonía y 225 fueron ingresaos na UCI. De los 648 pacientes pertenecientes a grupos encamentaos de vacunación, el 63% nun la recibieren.

Amás, publicáronse 86 fallecimientos por gripe confirmada nel llaboratoriu n'once comunidaes autónomes, el 64% n'homes. El 76% yera mayor de 64 años, el 22% tenía ente 45 y 64 y el 2% ente 15 y 44. De los 67 casos pertenecientes a grupos encamentaos de vacunación, el 64% nun s'había inmunizado.

N'Asturies, el siguimientu de casos graves hospitalizaos realízase de forma centinela entres los residentes nel área sanitaria IV (Uviéu), ingresaos nel HUCA. Sigue habiendo una baxa proporción de casos graves comparada cola temporada anterior y afecta principalmente a varones de 75 años o más y que presenten dalgún factor de riesgu.

 

Casos confirmaos

Hasta la primer selmana del 2018 contabilizáronse 225 casos ingresaos con gripe confirmao, con una tasa de 68 por 100.000 habitantes, que, comparada cola incidencia, supón una proporción d'ingresos del 2,4% de los casos que llegaron a Atención Primaria.

El 82% de los ingresos correspuéndese con persones de más de 50 años, el 69% presentaba dalgún factor de riesgu y, d'ellos, el 53% nun taba vacunáu. El 58% son varones y el 42%, muyeres.

Hasta esta selmana rexistráronse 45 casos graves (20% de los ingresos), con una tasa de 13,6 por 100.000 habitantes, de los qu'hai once finaos (24%) y seis ingresos na UCI. El 51% presentaba dalgún factor de riesgu (sobremanera enfermedaes cardiovascular y pulmonar cróniques, y la diabetes) y, d'ellos, el 52% nun taba vacunáu. De los once finaos, toos ellos afectaos con un virus gripal B, yeren homes nel 81% de los casos y el 91% tenía xuna edá de 70 años o más. Toos presentaben dalgún factor de riesgu y el 45% nun taba vacunáu. 

 

   Icono gráfico alusivo al tipo de archivo Informe semanal (Pdf: 627 Kb) (n'español)

Información sobre el documento

© Copyright 2006. Gobiernu del Principau d'Asturies