Gobiernu del Principau d'Asturies

Asturies, muncho más cerca

Tas en

Asturias.es Temes Economía y finances El Gobiernu d'Asturies va invertir anguaño más de dos millones ...
 

Economía y finances

El Gobiernu d'Asturies va invertir anguaño más de dos millones n'obres de carreteres y saniamientu en Llaviana

El vicepresidente Juan Cofiño anuncia 1,6 millones pa la meyora de la depuración de Tiraña, La Cucia y el Fabariegu. El Principáu destina 387. 000 euros a reparar les víes de Llaviana-Cabanaquinta y de San Pedro de Tiraña-L’Ordaliegu. La Conseyería d'Infraestructures asume con 530. 000 euros l'arreglu d'un fundimientu nel enllaz Tolivia-Fresneo, que va concluyir a primeros de febreru

De derecha a izquierda, el alcalde de Laviana, Julio García; el consejero de Infraestructuras, Juan Cofiño; Daniel Llamazares, gerente de la empresa Ramadal S.L; Inés García, vicealcaldesa de Laviana y José Manuel Llamazares, también gerente de la empresa adjudicataria de las obras

11/01/2020

El vicepresidente y conseyeru d'Infraestructures, Mediu Ambiente y Cambéu Climáticu, Juan Cofiño, anunció güei en Llaviana que’l so departamentu va invertir 2.074.276 euros anguaño nel conceyu p'acometer delles obres d'infraestructures de carreteres, saniamientu y agües.

Ente les actuaciones que se van llevar alantre ta'l saniamientu de Tiraña, La Cucia y El Fabariegu, al que se destinen 1,6 millones, d'un presupuestu global d'unos 2,5 millones. Van dedicase tamién 57.527 euros a la depuración d'agües de Fechaladrona.

Amás, una partida de 213.289 euros va dexar reparar murios na carretera AS-252, que xune Llaviana y Cabanaquinta, al so pasu pol conceyu llavianés, y otra de 174.344 euros va ameyorar la calzada LV-3 San Pedro de Tiraña-L’Ordaliegu.

Cofiño facilitó estos datos mientres la visita que realizó a les obres d'arreglu del fundimientu de la plataforma de la carretera LV-9, ente Tolivia-Fresneo, nes que’l Gobiernu d'Asturies invirtió 530.000 euros. Prevése que los trabayos concluyan en febreru, desque se remate la instalación de los sistemes de contención y la execución de xuntes, y estiéndase l'amiestu bituminosu en caliente, pintáu de marques viales, y dellos remates.

El fundimientu de la calzada producióse nel puntu quilométricu 0,050 de resultes de les intenses agües cayíes nos meses de xineru y febreru de 2019. Esta carretera, con un llargor total de 2.315 metros, ye l'únicu accesu a les poblaciones de La Cuesta, Tolivia, Fresneo, Les Campes, Les Praderes de Peña-Mea, y a les víes que comuniquen la Campa Doñango y Campa Pelúgano.

N'abril de 2019 yá s'acometieron les obres d'emerxencia necesaries pa restablecer la circulación, que quedare interrumpida pa toa mena de vehículos. Los trabayos incluyeron, per un llau, l’habilitación d'un pasu alternativu provisional y, por otru, la restitución de la plataforma afectada.

Les actuaciones consistieron, fundamentalmente, na llimpieza y saniamientu de la zona; la baltadera de la canalización estropiada; la construcción d'una estructura de vigues de 12 metros de llargor con estribos de cimentación fonda; la reposición de l’acera y el paquete de firme y pintáu de marques viales na zona afectada. Darréu, executóse una protección con escollera agües enriba de la estructura, pa minimizar l'efectu erosivu del agua sobre los estribos.

   Icono gráfico alusivo al tipo de archivo Audiu 1 (Audiu: 1 Mb) (n'español)   Icono gráfico alusivo al tipo de archivo Audiu 2 (Audiu: 2 Mb) (n'español)

Información sobre el documento

© Copyright 2006. Gobiernu del Principau d'Asturies