Gobiernu del Principau d'Asturies

Asturies, muncho más cerca

Tas en

Asturias.es El Principáu crea un Comité Asesor de Política Científica en ...
 

Aniciu

El Principáu crea un Comité Asesor de Política Científica en materia d’innovación, investigación y desenvolvimientu tecnolóxicu

L’órganu, de calter consultivu, va tar integráu por persones de prestixu y esperiencia reconocíes. La función principal va ser la ellaboración d’estudios y propuestes qu’ayuden a impulsar un ecosistema d’I+D+i fuerte pa la reactivación d’Asturies

28/06/2020

El Gobiernu d’Asturies aprobó la creación d’un Comité Asesor de Política Científica, que va funcionar como órganu consultivu y de participación de la Conseyería de Ciencia, Innovación y Universidá en materia d’innovación, investigación y tresferencia tecnolóxica. El grupu de trabayu va tar integráu por profesionales de probáu prestixu y esperiencia, que colos sos estudios y propuestes van ayudar a impulsar un ecosistema investigador y innovador fuerte y estable nel Principáu.

El comité va tar presidíu pol conseyeru de Ciencia, Innovación y Universidá, Borja Sánchez, y integráu por 8 vocales, 3 d’ellos miembros natos de la conseyería y otros 5 designaos por resolución ente persones espertes de reconocida reputación profesional en toles árees de conocencia. L’equipu va incidir sobre manera n’ámbitos d’interés pal futuru d’Asturies, como la biomedicina y la biotecnoloxía, la nanotecnoloxía, les tecnoloxíes de la información y la comunicación, l’alimentación o la intelixencia artificial.

Una de les funciones del órganu nuevu va ser asesorar al titular de la conseyería na definición d’un sistema de gobernanza de la ciencia qu’estableza les árees prioritaries y actividaes d’I+D+i, al traviés de la negociación de la nueva estratexa d’especialización intelixente Asturies RIS3.

El conseyeru Borja Sánchez indicó qu’esti grupu de trabayu “constitúyese pensando nel futuru d’Asturies y en que la covid-19 punxo la ciencia nun sitiu estratéxicu pa la reconstrucción y reactivación económica de la comunidá”.

El comité asesor forma parte de los órganos recoyíos nel Plan de Ciencia, Tecnoloxía y Innovación (PCTI) d’Asturies. Nel alcuerdu que formaliza la so creación, aprobáu na última xunta del Conseyu de Gobiernu, ponse en valor la ciencia como clave p’acometer “la nueva revolución industrial, aprovechando’l gran capital industrial asturianu pa incorporase a les tecnoloxíes nueves”, amás de pa tratar d’aprovechar los fondos que puen venir de la Unión Europea.


Icono gráfico alusivo al tipo de archivo Audiu (Audiu: 819 Kb) (n'español)

Información sobre el documento

© Copyright 2006. Gobiernu del Principau d'Asturies