Gobierno del Principado de Asturias

Asturias, mucho más cerca

Estás en

Aniciu Gobiernu Actualidá El Principáu impulsa en dos años toles acciones incluyíes na ...
 

Actualidá

El Principáu impulsa en dos años toles acciones incluyíes na Estratexa asturiana contra la resquiebra salarial

Actividaes de formación y sensibilización, la convocatoria de la Marca asturiana d’escelencia n’igualdá y la creación d’una ventana, ente les midíes desenvueltes. Esta iniciativa dexó que remanecieren doce denuncies sobre discriminación de xéneru como complementu a les 93 actuaciones executaes d’oficiu pola Inspección de Trabayu y Seguridá Social. El conseyeru de Presidencia destaca la collaboración institucional y la implicación de sindicatos y asociaciones empresariales pa entainar na igualdá ente homes y muyeres

: el consejero de Presidencia y Participación Ciudadana, Guillermo Martínez, y la directora general del Instituto Asturiano de la Mujer y Políticas de Juventud, Almudena Cueto, en un momento de la reunión

22/02/2019

La Conseyería de Presidencia y Participación Ciudadana desenvolvió toles acciones, un total de 16, recoyíes na Estratexa asturiana contra la resquiebra salarial, impulsada va dos años pa entainar na igualdá efectiva ente homes y muyeres y facer frente a les diferencies retributives por cuestión de xéneru. Les midíes incluyeron actividaes de sensibilización, formación a representantes sindicales pa la incorporación de la perspectiva de xéneru na negociación colectiva, la reconocencia a les bones práctiques empresariales y la identificación de posibles situaciones discriminatories al traviés de la ventana contra la resquiebra salarial.

La puesta en marcha de la estratexa fixo posible que remanecieren pela ventana doce denuncies, de les que dos yeren consultes, sobre posibles situaciones de discriminación llaboral y salarial, y de vulneración de la garantía d’indemnidá depués del exerciciu d’acciones xurídiques. Seis de les reclamaciones, que se punxeron en conocimientu de la Inspección de Trabayu y Seguridá Social, remataron n’espedientes qu’aprecien distintos estadios de discriminación y una derivó nun procedimientu sancionador.

Paralelamente, nos postreros dos años la Inspección de Trabayu llevó a cabu 93 actuaciones d’oficiu en materia d’igualdá de xéneru, de les que resultaron cinco sanciones y trés requerimientos de subsanación d’irregularidaes. Por árees, 34 espedientes tán rellacionaos cola prevención de riesgos llaborales y motivaron trés requerimientos por irregularidaes; 18 céntrense na conciliación de la vida llaboral y familiar, con 2 procedimientos sancionadores, y 41 informes afecten a la obligación d’adoptar midíes d’igualdá nes empreses, con 3 sanciones.

“Tenemos que poner en valor el compromisu del Gobiernu d’Asturies y de la Inspección de Trabayu pa definir un modelu de denuncia, formar al personal en materia d’igualdá y promocionar la ventana única p’avanzar na superación de les desigualdaes”, destacó’l conseyeru Guillermo Martínez depués de la xunta del grupu de trabayu de la estratexa. El titular de Presidencia valoró tamién “la collaboración institucional y la implicación de los axentes sociales y económicos p’aunir esfuerzos contra la resquiebra salarial”.



Marca n’igualdá

Dientro de les actividaes de sensibilización pa promover la implicación de los actores socioeconómicos frente les discriminaciones de xéneru, destaca la proyección que llogró la Marca asturiana d’escelencia n’igualdá, una acreitación que reconoz a empreses y entidaes comprometíes cola incorporación de modelos de xestión basaos nel respetu y la igualdá d’oportunidaes. Nes trés convocatories efectuaes hasta’l momentu, presentáronse 72 candidatures, ente les que resultaron escoyíes y acreitaes 15.

El conseyeru sorrayó “el creciente interés y compromisu pa con una cultura nueva que xenera retornos positivos pa les empreses y beneficios pal conxuntu de la sociedá”. A esti llabor ayuda la Escuela d’Entamadores y Empresaries d’Asturies, que nos dos últimos años y nel marcu de la Estratexa contra la resquiebra asesoró a 16 empreses y asociaciones pa impulsar planes d’igualdá y punxo en marcha una campaña de fomentu de la corresponsabilidá con más 200 empreses contactaes, 53 visites presenciales y 15 autodiagnósticos de conciliación. Dende la escuela tamién s’ufiertó formación a 40 representantes sindicales pa promover la perspectiva de xéneru na negociación colectiva.

Dientro de les midíes de la estratexa tamién se desenvolvieron otres actividaes como’l proyectu Ingepre sobre prevención de riesgos llaborales y salú llaboral en sectores feminizaos, diose sofitu económicu a 11 proyectos de sindicatos y asociaciones de promoción de la igualdá. Amás, la Universidá d’Uviéu realizó un estudiu sobre la situación de la muyer na institución académica y dende l’ámbitu educativu impulsáronse dos iniciatives: el programa Asturies Steam pa estimular vocaciones científiques y n’árees tecnolóxiques ente les alumnes de la ESO y la campaña Somos FP, somos iguales coincidiendo cola apertura de la matriculación de los ciclos formativos.

 

   Icono gráfico alusivo al tipo de archivo Audiu (Audiu: 2 Mb) (n'español)

Información sobre el documento

© Copyright 2006. Gobierno del Principado de Asturias