Gobiernu del Principau d'Asturies

Asturies, muncho más cerca

Tas en

Asturias.es Temes Tresportes y Movilidá Tresporte ferroviariu y por cable La conseyera d'Infraestructures alvierte de que'l proyectu de la ...
 

Tresporte ferroviariu y por cable

La conseyera d'Infraestructures alvierte de que'l proyectu de la estación intermodal pa Xixón sigue paralizáu

Los representantes del Principáu volvieron votar güei en contra del alcuerdu qu'adoptó n'avientu'l conseyu d'alministración de la sociedá que xestiona'l plan de víes

La conseyera d'Infraestructures, Ordernación del Territoriu y Mediu Ambiente, Belén Fernández, na xunta caltenida.

31/03/2016

La conseyera d'Infraestructures, Ordenación del Territoriu y Mediu Ambiente, Belén Fernández, alvirtió güei de que'l proyectu pa la construcción de la estación intermodal de Xixón sigue paralizáu. Fernández pronuncióse nestos términos al rematar la xunta del conseyu d'alministración de la sociedá Xixón al Norte, un alcuentru, al so xuiciu, “improductivu dafechu, que solo sirvió pa formular les cuentes de la entidá”.

Los representantes de la sociedá que xestiona'l plan de víes de Xixón ratificaron, col votu en contra de los conseyeros socialistes, l'alcuerdu adoptáu'l pasáu mes d'avientu. El Principáu recurrió'l citáu alcuerdu por posibles infracciones tanto na forma como nel plazu de la convocatoria del últimu conseyu y el xulgáu de primera instancia númberu 3 d'Uviéu almitió a trámite'l recursu'l pasáu 22 de febreru.

Nesti sentíu, la titular d'Infraestructures recordó que n'avientu se tomó una decisión “con alvertencies d'illegalidá”, remanando razones d'interés públicu y la necesidá d'avanzar nel proyectu. “Y agora, más de tres meses dempués, lo que constatamos ye que nun s'avanzó un res y que los estudios que'l Ministeriu de Fomentu se comprometió a presentar al conseyu nin siquier s’empecipiaron”, llamentó.

Tamién aseguró que'l recursu presentáu pol Gobiernu d'Asturies nun suspende la execución de los actos y nun pue usase como escusa “pa nun faer nada”.

Belén Fernández destacó que los conseyeros socialistes participaron na reunión con una actitú flexible y con predisposición total a analizar distintes alternatives d'allugamientu pa la estación. Tamién cola voluntá d'almitir adaptaciones del proyectu p'afaelo a les fórmules que dexen un meyor acomodu financieru. Sicasí, según señaló, tanto la respuesta del Ministeriu de Fomentu como del Conceyu de Xixón “foi un non rotundo”.

La conseyera insistió en que “la intransixencia amosada poles alministraciones estatal, del PP, y local, de Foru, a les que namá-yos sirve l'alternativa d'allugar la estación frente al Muséu del Ferrocarril, obligó al Principáu a votar de nuevo en contra del alcuerdu, como yá fixo nel conseyu celebráu n'avientu.

Información sobre el documento

© Copyright 2006. Gobiernu del Principau d'Asturies