Gobiernu del Principau d'Asturies

Asturies, muncho más cerca

Tas en

Asturias.es La Conseyería de Presidencia destina 217.800 euros a los ...
 

Aniciu

La Conseyería de Presidencia destina 217.800 euros a los programes Culturaquí 2019 y Artistes mozos contra la violencia de xéneru

La directora del Institutu Asturianu de la Muyer presentó güei dambes iniciatives, qu’incluyen premios a curtiumetraxes, grafitis, proyectos artísticos y testos teatrales

La directora general del Instituto Asturiano de la Mujer y Políticas de Juventud, Almudena Cueto dcha., y la responsable de Programas Culturales del Instituto Asturiano de la Juventud, María José Baragaño

18/06/2019

La Conseyería de Presidencia y Participación Ciudadana, al traviés del Institutu Asturianu de la Muyer y Polítiques de Mocedá, convoca los programes Artistes mozos contra la violencia de xéneru y Culturaquí 2019, que cunten con un presupuestu de 217.800 euros y van premiar, ente otres iniciatives, curtiumetraxes, grafitis, proyectos artísticos y testos teatrales que combatan el maltratu machista.

El primeru d’estos programes, financiáu con 60.800 euros, ta dirixíu a mocedá que naciere n’Asturies, o que viva nel Principáu o seya descendiente hasta segundu grau d’emigrantes asturianos, y que la so edá nun supere los 35 años a 31 d’avientu del 2019. Contien cuatro convocatories:

   - Premiu Realizadores Nuevos contra la violencia de xéneru, en collaboración col Festival Internacional de Cine de Xixón. Van almitise proyectos de curtiumetraxes de tema lligáu a la llucha contra’l maltratu machista, en castellanu o asturianu, que nun superen los 25 minutos. Los trabayos tienen qu’incluyir: guión, presupuestu, plan de rodaxe, memoria de dirección, plan d’esplotación y formatu d’exhibición prevista, cualquier fonte de financiamientu adicional, acreitación, etcétera. Establezse un premiu de 5.000 euros y el proyectu escoyíu va estrenase nel Festival Internacional de Cine de Xixón del 2020.
   - Grafitis contra la violencia sexista. Pue presentase mocedá a títulu individual o dientro d’un colectivu d’artistes. Van almitise proyectos con temes lligaos la llucha contra la violencia de xéneru, que se van realizar n’El Campu esti branu. Van escoyese seis propuestes que van recibir un premiu de 800 euros.
   - Premiu Astragal contra la violencia de xéneru. Ta dedicáu a proyectos artísticos (instalaciones, videu-instalaciones, acciones, intervenciones y otros procesos creativos), que, inspiraos na llucha contra la violencia sexista, se realicen espresamente pa la sala d’esposiciones del Espaciu Astragal del Centru de Recursos del Conseyu de la Mocedá de Xixón. Establécense dos premios de 3.000 euros caún.
   - Premio Escena contra la violencia sexista. Van poder presentase autores y grupos de teatru non profesionales con proyectos que tienen qu’incluyir un testu teatral orixinal y inéditu y una propuesta d’interpretación. Escritos en castellanu o asturianu, la so duración ha ser la normal d’una representación. Establezse un únicu premiu de 15.000 euros.
   - Otres actuaciones al amparu d’esti programa son:
   - Equivocada nun ye’l mio nome. Proyectu espositivu comisariáu por Semiramis González en Llaboral Centru d’Arte y Creación Industrial, que se va exhibir del 27 de setiembre al 21 d’avientu del 2019. La esposición propón un percorríu peles obres d’artistes que trabayaron la denuncia contra la violencia dende l’arte con distintes propuestes de videu, instalación o performance.
   - Xornaes Arte y violencia de xéneru. Les fíes d’Eva. Estos alcuentros van celebrase los díes 6 y 7 de payares en Llaboral Centru d’Arte y Creación Industrial, como complementu a la esposición alredor de la creación y la violencia de xéneru.
   - La directora del Institutu de la Muyer, Almudena Cueto, presentó güei esti programa, xunto a la 30.er edición del programa de promoción de creadores mozos Culturaquí 2019, que busca impulsar la vocación artística xuvenil nes distintes modalidaes que conformen les artes plástiques, la lliteratura o la música, amás de fomentar la participación de mocedá con moliciones artístiques y difundir estes manifestaciones culturales tanto nel Principáu como fuera de la comunidá autónoma.
   - La participación ta abierta a cualquier artista que naciere o viva nel Principáu y que la so edá nun supere los 35 años a 31 d’avientu d’anguaño. Tamién puen participar descendientes hasta segundu grau d’emigrantes, una posibilidá que dexó, dende’l 2008, internacionalizar el programa ensin arrenunciar a les bases d’asturianía sobre les que se sofita.
   - Incluye cinco convocatories:
   - Muestra d’Artes Plástiques. Pue presentase cualquier tipu de propuesta artística: pintura, escultura, fotografía, dibuxu, grabáu, instalaciones, videoinstaciones. El tema, la técnica y los materiales van ser de llibre elección. Un xuráu va escoyer un máximu de seis artistes, que caún d’ellos va recibir un premiu en metálico de 500 euros. Toos ellos van formar parte d’una esposición colectiva na Sala Borrón na primavera del 2020. Ente los escoyíos va fallase’l Premiu Asturies Xoven d’Artes Plástiques, dotáu con 2.000 euros y qu’implica una esposición individual na Sala Borrón.
   - Concursu de Maquetes pa grupos pop y rock. Realizáu en collaboración con Cadena Ser, 40 Principales Asturias, ta dirixíu a grupos o solistes intérpretes de música pop y rock. Va escoyese una maqueta ganadora y va grabase un discu. Amás, hai la posibilidá de que los escoyíos realicen conciertos de promoción.
   - Premiu Asturies Xoven de Poesía, Narrativa y Testos Teatrales. N’asturianu o en castellanu, les obres ganadores van recibir un premiu de 1.000 euros y van editase dientro de la colección Texu.
   - Programa d’esposiciones de artistes plásticos mozos na Sala Borrón. Va poder presentase cualquier propuesta artística (pintura, escultura, fotografía, instalaciones, videoinstalaciones…) con llibertá de tema, técnica y materiales. Los proyectos escoyíos van formar parte de la programación de la Sala Borrón na temporada 2019.
   - Premiu Realizadores Nuevos, en collaboración col Festival Internacional de Cine de Xixón. Van almitise proyectos de curtiumetraxes de tema lligáu a la llucha contra’l maltratu machista, en castellanu o asturianu, que nun superen los 25 minutos. Los trabayos tienen qu’incluyir: guión, presupuestu, plan de rodaxe, memoria de dirección, plan d’esplotación y formatu d’exhibición prevista, cualquier fonte de financiamientu adicional, acreitación, etcétera. Establezse un premiu de 5.000 euros y el proyectu escoyíu va estrenase nel Festival Internacional de Cine de Xixón del 2020.

 

Información sobre el documento

© Copyright 2006. Gobiernu del Principau d'Asturies