Gobiernu del Principau d'Asturies

Asturies, muncho más cerca

Tas en

Asturias.es Mayores El Gobiernu d'Asturies designa personal sanitariu pa dirixir ...
 

Mayores

El Gobiernu d'Asturies designa personal sanitariu pa dirixir l'asistencia nos centros de mayores y discapacidá con positivos

El Sespa noma a profesionales médicos en 24 centros de la rede pública y privada onde hai afectaos pol COVID-19. La intervención de Salú va permitir dar respuestas más áxiles énte infecciones nueves

28/03/2020

El Gobiernu d'Asturies designó personal sanitariu pa que dirixa l'asistencia médica nos centros de persones mayores o con discapacidá nos que se rexistraron casos positivos del coronavirus nuevu. Trátase d'una midida de refuerzu pa dar soporte a les direcciones de los mesmos centros, mesmo qu’a los equipos profesionales que trabayen nes residencies destinaes a persones mayores o con discapacidá.

La decisión ye frutu de la coordinación sociosanitaria: va ser el Serviciu de Salú Pública del Principáu d'Asturies (Sespa) el que va designar al sanitariu titular en cada centru y la Conseyería de Derechos Sociales y Bienestar la que se va encargar de velar pol cumplimientu de les acciones alcordaes. La directora xerente del Sespa, Concepción Saavedra, informó que fueron nomaos como responsables 21 sanitarios, “que son les persones que van coordinar toles actuaciones en relación al COVID-19 col fin de protexer a esta población más vulnerable”.

“Vamos siguir faciendo too aquello que tea nes nuestres manes pa reforzar l'asistencia y los cuidaos de los sectores más vulnerables de la población, como son les persones mayores o con discapacidá. Por ello, adoptamos midíes, siempre en coordinación cola Conseyería de Salú, enfocaes a menguar el riesgu d'andada y que nos van permitir tamién dar una respuesta más axilosa énte nuevos positivos”, añedió la conseyera de Derechos Sociales, Melania Álvarez.

Les intervenciones propuestes van llevase a cabu en centros tanto de la rede pública como privada: residencies d’El Naranco, El Cristo, Santa Teresa, Arcoiris y Virxe de la Casa, n'Uviéu; residencies Clara Ferrer, Cimadevilla, Montevil, Xovellanos, y Centru Sociosanitariu Hospital Xixón, en Xixón; residencia Virxe del Carbayu y Sanatoriu Adaro, en Llangréu, y les residencies de Grau, Sotiel.lo (Mieres), El Parque (Siero), San Pedro (Salas), Costamar (Gozón), San Pancracio (Carreño), Faustino Sobrino (Llanes), Colexu San Francisco (Villaviciosa), Doña Manolita (Candamu), Morea (Ayer), San Andrés (Trubia) y Palaciu del Villar (Castrillón).

Información sobre el documento

© Copyright 2006. Gobiernu del Principau d'Asturies