Gobiernu del Principau d'Asturies

Asturies, muncho más cerca

Tas en

Asturias.es El Gobiernu d’Asturies invierte más de mediu millón na ...
 

Aniciu

El Gobiernu d’Asturies invierte más de mediu millón na reparación d’un tramu de carretera entre Granda y El Castru, en Siero

La directora xeneral d’Infraestructures, Esther Díaz, visita les obres del vial comprendíu ente les intersecciones de l’AS-383 cola N-634 San Sebastián-Santiago de Compostela y la SI-2 Llugones-Viella. Los trabayos, que tán a puntu de rematar, faciliten una mayor seguranza y comodidá a los usuarios

La directora xeneral d'Infraestructures, Esther Díaz, xunto al alcalde de Siero, Ángel García, y técnicos de la obra

20/01/2020

La Conseyería d’Infraestructures, Mediu Ambiente y Cambéu Climáticu invirtió 519.846 euros nes obres d’arreglu del tramu de la carretera del conceyu de Siero AS-383 (Granda-El Castru), comprendíu ente les intersecciones d’esta vía cola N-634 San Sebastián-Santiago de Compostela y la SI-2 Llugones-Viella.

La directora xeneral d’Infraestructures, Esther Díaz, visitó güei les obres, que tán a puntu de concluyir, a falta de remates pequeños, amás de la instalación de señalización vertical nueva y barreres de seguranza.

Les actuaciones, que s’executaron nun total de 2.335 metros de carretera, consistieron, amás de la llimpieza xeneral y la roza de turries y reperfiláu de cunetes, nel sanéu de blandones y el so posterior recebu con base granular de tritu artificial.

Con calter xeneral, realizóse una rehabilitación superficial del firme, consistente na estensión d’una capa de regularización, siguida d’una de rodadura, dambes de mezcla bituminoso en caliente, con una espesura total media de 10 centímetros. Pa reponer los accesos existentes afectaos polos trabayos fuera de calzada usóse pavimentu de formigón de 12 centímetros d’espesura sobreuna capa de base granular formada por 15 centímetros de tritu artificial.

El proyectu incluyó, amás, la reposición d’obres de fábrica y drenaxe que s’atopaben en mal estáu de caltenimientu, llogrando asina una meyora curiosa del sistema, complementao cola inclusión de tramos nuevos de cuneta y dellos caños. P’acabar, procedióse al pintáu de les marques viales.

Esta actuación de la Conseyería d’Infraestructures aumenta la seguranza y comodidá de los usuarios qu’usen esta carretera.

Información sobre el documento

© Copyright 2006. Gobiernu del Principau d'Asturies