Gobiernu del Principau d'Asturies

Asturies, muncho más cerca

Tas en

Asturias.es Temes Servicios sociales El Gobiernu d’Asturies impulsa una campaña d’acoyimientu pa ...
 

Servicios sociales

El Gobiernu d’Asturies impulsa una campaña d’acoyimientu pa buscar casa a veintiún menores que viven en centros del Principáu

La iniciativa, qu’empieza güei en Xixón y va siguir n’Uviéu y Avilés, busca families pa neños y neñes de 0 a 3 años. La Conseyería de Derechos Sociales y Bienestar aumenta anguaño hasta 700 euros mensuales les ayudes a les persones acoyedores

izda. a dcha, Carlos Becedoniz, Dtor. del Instituto Asturiano para la Atención Integral a la Infancia y las Familias; Natalia González, concejala delegada de Derechos Sociales y Bienestar del Ayuntamiento de Gijón; la influencer gijonesa Isabel Llano y la consejera de Derechos Sociales y Bienestar, Melania Álvarez, en los Jardines del Náutico, donde se ha instalado un cubo con información sobre la campaña Te estaba esperando

14/09/2020

El Gobiernu d’Asturies empieza güei en Xixón una campaña d’acoyimientu pa buscar families a ventiún neños y neñes d’hasta trés años que viven en centros del Principáu. Cruz Bermeya y la Fundación Meniños, entidaes con gran esperiencia nesti ámbitu, collaboren tamién na iniciativa.

Pa facilitar l’acoyimientu familiar, la Conseyería de Derechos Sociales y Bienestar amplió anguaño hasta 700 euros mensuales les ayudes que perciben les persones que se faen cargu de menores institucionalizaos.

La conseyera Melania Álvarez, que participó na presentación de la campaña, animó a la ciudadanía a sofitar esta iniciativa. “Somos sabedores de que los menores precisen una familia que-yos dea ciñu y sofitu y sabemos que la sociedá asturiana ye solidaria. Cualquier persona mayor de 25 años que tenga gana y ilusión pue ser la cuenta pa ufiertar una casa a los pequeños”, señaló.

La inauguración fíxose nos Xardinos d’El Naútico, en Xixón, onde s’asitió un cubu de grandes dimensiones que nes sos cares refléxense imáxenes de neños y neñes. Col lema Taba esperándote, el Principáu quier sensibilizar a la ciudadanía p’atopar families acoyedores. El cubu va permanecer hasta’l día 22 en Xixón y depués va asitiase n’Uviéu y Avilés.

Tamién se va repartir cartelería y folletos informativos nos demás conceyos d’Asturies.

Les persones interesaes n’informase de les condiciones y requisitos pa ser familia d’acoyida puen llamar a los teléfonos gratuitos: 900 701 127 y 900 907 052. Amás, disponen de tola información na web www.familiasacogedoras.es y puen optar tamién por ponese en contactu directamente cola Conseyería de Derechos Sociales y Bienestar.

Anguaño, n’Asturies hai 347 menores que viven n’acoyimientu residencial. D’esta cifra, cuasi la metá son adolescentes, con edaes ente los 15 y los 17 años.


Icono gráfico alusivo al tipo de archivo Audiu (Audiu: 1 Mb) (n'español)

Información sobre el documento

© Copyright 2006. Gobiernu del Principau d'Asturies