Gobiernu del Principau d'Asturies

Asturies, muncho más cerca

Tas en

Asturias.es Temes Infraestructures y territoriu El Gobiernu d’Asturies va invertir 2,5 millones n’anovar la rede ...
 

Infraestructures y territoriu

El Gobiernu d’Asturies va invertir 2,5 millones n’anovar la rede de fibra óptica y va estender el so serviciu a más de 61.000 viviendes y locales

La Conseyería de Ciencia, Innovación y Universidá quier ameyorar la competitividá en telecomunicaciones y sentar les bases pa la implantación del 5G. El procesu de modernización tecnolóxica que va llevar a cabu la sociedá Xitpa va empezar nos primeros meses de 2020

25/11/2019

El Gobiernu d'Asturies va anovar la rede tecnolóxica de cable, que na actualidá da cobertura a mediu centenar de poblaciones y 59.000 viviendes y locales, p'ameyorar el serviciu que s'ufierta a los operadores de telefonía ya internet. La Conseyería de Ciencia, Innovación y Universidá va destinar 2,5 millones d'euros a la sustitución d'equipos técnicos de la rede Asturcón (Ástur de Comunicaciones Óptiques Neutres) pa incorporar les últimes meyores tecnolóxiques y va poner en marcha un programa d'ampliación con 2.700 unidaes más nuna trentena de poblaciones.

La sociedá de Xestión d'Infraestructures Públiques de Telecomunicaciones del Principáu d'Asturies (Xitpa) va ser la encargada de realizar l’anovación tecnolóxica d'Asturcón, la rede de Banda Ancha que s'ufierta a los operadores pa qu'empresten servicios a los usuarios en condiciones d'igualdá y competencia. Ta previsto qu'esti procesu salga a llicitación nos primeros meses del próximu añu, con un periodu d'execución de 18 meses.

La sustitución del equipamientu técnicu va afectar a los 20 nodos d'accesu que lleven la fibra óptica a 49 poblaciones repartíes en 23 conceyos. En total, nestos momentos da serviciu a más de 59.000 viviendes y locales, mesmo que a la rede d'hospitales del Gobiernu d'Asturies.

En paralelo, Xitpa va empezar tamién a principios de 2020 l'ampliación de la rede nes árees onde ta esplegada al envís de cubrir nueves necesidaes que surdieron pol crecimientu de delles poblaciones. El director xeneral de la sociedá, Luis González, cifra en más de 80 les actuaciones que van realizar dientro d'esti plan pa llevar la fibra óptica a 2.700 viviendes y locales más en 33 poblaciones.

Trátase de dir completando'l mapa de fibra óptica y d'anovar equipos obsoletos onde los operadores nun pueden dar serviciu. “L'oxetivu ye ser más competitivos y que los operadores puedan ufiertar más velocidá, que puedan esplegase en zones onde agora nun lleguen y permitir el crecimientu de la rede”, afirma'l director xeneral d'Innovación, Investigación y Tresformamientu Dixital y vicepresidente del conseyu d'alministración de Xitpa, Iván Aitor Lucas. “Ye un pasu fundamental pa ponenos nel sieglu XXI y pa sentar les bases de la implantación del 5G n'Asturies”, añede.

La sociedá de xestión anovó apocayá'l so conseyu d'alministración, presidíu pol conseyeru de Ciencia, Innovación y Universidá, Borja Sánchez, y del que formen parte representantes de les conseyeríes d'Infraestructures, Presidencia ya Industria. Los nuevos planes, tanto d’anovación como d'ampliación de la rede, enmárcase nun procesu de refuerzu de Xitpa cola incorporación a la plantiya de dos puestos que taben pendientes de cubrir y la potenciación de les actividaes de xestión d'altes na rede Asturcón.

   Icono gráfico alusivo al tipo de archivo Audiu (Audiu: 718 Kb) (n'español)

Información sobre el documento

© Copyright 2006. Gobiernu del Principau d'Asturies