Gobiernu del Principau d'Asturies

Asturies, muncho más cerca

Tas en

Asturias.es Families El Gobiernu d'Asturies va poner en marcha esti añu la Estratexa ...
 

Families

El Gobiernu d'Asturies va poner en marcha esti añu la Estratexa Integral d'Infancia, venceyada al desenvolvimientu sostenible

El programa, con una década de vixencia, fomenta'l consumu responsable, la llucha contra'l cambéu climáticu y l'igualdá de xéneru. El Pactu cola Infancia va centrar el so trabayu en 2020 nel ámbitu de la salú con actuaciones pa prevenir el consumu de drogues y alcohol n'adolescentes y la obesidá infantil

Un momento de la reunión del consejo rector del Instituto Asturiano para la Atención Integral a la Infancia y a las Familias

07/01/2020

El Gobiernu d'Asturies va poner en marcha esti añu la Estratexa Integral d'Infancia, que va tar basada nos oxetivos de desenvolvimientu sostenible que promueve l'Axenda 2030 de Naciones Xuníes y va incluyir midíes como la promoción del consumu responsable, la igualdá de xéneru, la erradicación de la probeza o la llucha contra'l cambéu climáticu.

La iniciativa foi alcordada güei na xunta del Conseyu Rector del Institutu Asturianu pa l’ Atención Integral a la Infancia y a les Families, que presidió la conseyera de Derechos Sociales y Bienestar, Melania Álvarez, y nel que tamién s'activó un añu más el Pactu cola Infancia del Principáu d'Asturies, aprobáu pol parlamentu asturianu en 2018, a iniciativa de Unicef.

La Estratexa Integral d'Infancia, que va empezar a desenvolvese agora y va entrar a valir a finales del exerciciu, con una vixencia de diez años, va garantizar la promoción de tolos derechos de les persones menores d'edá, al pie de la so educación y protección de la salú.

Tamién pretende ameyorar los procedimientos xurídicos, organizativos, metodolóxicos y d'intervención cola fin d'optimizar la calidá de l'atención que s'apurre a los menores d'edá en situación de desprotección y a les sos families. Nesta llinia, la estratexa inclúi midíes específiques pa la infancia en situación de conflictu social, enfocaes a la reeducación y reinserción social o iniciatives empobinaes a garantizar l'acoyimientu familiar.



Pactu cola Infancia en 2020

Respectu al Pactu cola Infancia, les actuaciones pa 2020 van incidir na llinia estratéxica relativa a la salú; en concretu, van promovese polítiques integrales que contribuyan a amenorgar el consumu d'alcohol y drogues n'adolescentes. Pa ello, va abordase la problemática dende distintos ámbitos y va arreyase a l'adolescencia na solución.

Amás, van adoptase midíes complementaries p’amenorgar la obesidá infantil, por aciu la intervención educativa, actuaciones nel ámbitu de la salú mental infantil o la promoción de la educación afeutivu- sexual dende un enfoque socioeducativu y sanitariu y nel que se promuevan les relaciones d'igualdá.

Información sobre el documento

© Copyright 2006. Gobiernu del Principau d'Asturies